بۇل تۋرالى ۇكىمەت وتىرىسىندا يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ تۇرعىن ءۇي ساياساتىنداعى جاڭا تاسىلدەر تۋرالى ايتىپ بەردى، دەپ حابارلايدى almaty-akshamy.kz baq.kz سىلتەمە جاساپ.
مينيستر اتاپ وتكەندەي، 2021 جىلدىڭ قورىتىندىسىنا سايكەس، رەسپۋبليكا بويىنشا 17،1 ملن شارشى مەتر جاڭا تۇرعىن ءۇي سالىندى. ياعني 151 مىڭ ازامات تۇرعىن ءۇي جاعدايلارىن جاقسارتتى.
تۇرعىن ءۇي قۇرىلىسىنا ينۆەستيسيالار بىلتىرعى جىلدىڭ ءتيىستى كەزەڭىمەن سالىستىرعاندا 19،1%-عا ءوسىپ، 2،4 ترلن تەڭگە بولدى. بيىلدان باستاپ «شارشى مەتر قۇرىلىسىنان» جايلى ءومىر ءسۇرۋ ورتاسىن قالىپتاستىرۋعا كوشۋدى جوسپارلاپ وتىرمىز. وعان جەر رەسۋرستارىن ءتيىمدى پايدالانۋ، كوشە-جول جەلىسىن دامىتۋ جانە قوعامدىق كەڭىستىكتەردىڭ ساپاسىن ارتتىرۋ ەسەبىنەن جيناقى جانە الۋان ءتۇرلى قۇرىلىس سالۋ ارقىلى كوشەمىز، - دەيدى قايىربەك وسكەنبايەۆ.
ازاماتتاردىڭ تۇرعىن ءۇي ماسەلەلەرىن شەشۋدىڭ نەگىزگى تاسىلدەرى سۋبسيديالار، تۇرعىن ءۇيدى جالعا الۋعا ارنالعان تۇرعىن ءۇي تولەمدەرى، قۇرىلىس سالۋشىلاردان دايىن تۇرعىن ءۇي ساتىپ الۋ، ەسكى كۆارتالداردى رەنوۆاسيالاۋ، پروبلەمالىق وبەكتىلەردى اياقتاۋ ارقىلى مەملەكەتتىك قولداۋدىڭ جاڭا تەتىكتەرى بولادى.
وسىنى ەسكەرە وتىرىپ، بيىلعى جىلعا تۇرعىن ءۇيدى ىسكە قوسۋدىڭ جىلدىق كولەمىن 17 ملن شارشى مەتر دەپ بەلگىلەۋدى ۇسىنامىز، - دەپ ايتتى ول ۇكىمەت وتىرىسىندا.