بيۋدجەتىن يگەرە الماعان وبلىستار اتالدى

ۇكىمەت وتىرىسىندا قارجى ءمينيسترى ەرۇلان جاماۋبايەۆ مەملەكەتتىك بيۋدجەتتىڭ شىعىستارى تۋرالى ايتتى، دەپ حابارلايدى Almaty-akshamy.kz. 

«مەملەكەتتىك بيۋدجەتتىڭ شىعىستارى 98،5%-كە، رەسپۋبليكالىق بيۋدجەتتىڭ شىعىستارى – 98،8%-كە، جەرگىلىكتى بيۋدجەتتەردىڭ شىعىستارى 98،9%-كە اتقارىلدى. رەسپۋبليكالىق بيۋدجەت بويىنشا سوماسى 9 ترلن تەڭگەگە شىعىستار جۇرگىزىلدى. اتقارىلماۋ 109 ملرد تەڭگەنى قۇرادى، ونىڭ ىشىندە 21 ملرد تەڭگە - ۇنەمدەۋ. يگەرىلمەگەنى - 88 ملرد تەڭگە. يگەرىلمەۋدىڭ نەگىزگى سەبەپتەرى: كونكۋرستىق راسىمدەردىڭ ۇزاق جۇرگىزىلۋى؛ شارتتاردى، قوسىمشا كەلىسىمدەردى جاساسۋ راسىمدەرىنىڭ ۇزاق جۇرگىزىلۋى، بيۋدجەتتىك باعدارلامالاردى (كىشى باعدارلامالاردى) ىسكە اسىرۋ جونىندەگى نورماتيۆتىك قۇقىقتىق اكتىلەردىڭ ۋاقتىلى قابىلدانباۋى؛ ورىندالعان جۇمىس اكتىلەرىنىڭ، شوت-فاكتۋرالاردىڭ ۋاقىتىلى ۇسىنىلماۋى؛ ەسەپتى ايدا قاراجاتتى جۇمساۋ قاجەتتىلىگىنىڭ بولماۋى»، - دەدى ول.

سونداي-اق، مينيستر جەرگىلىكتى بيۋدجەتتەردىڭ شىعىستارى 4،4 ترلن تەڭگەنى قۇراعانىن ايتتى، دەپ جازدى Azattyq Ruhy.

«اتقارىلماعانى - 47 ملرد تەڭگە. بيىل وڭىرلەرگە 2 ترلن تەڭگەگە جۋىق نىسانالى ترانسفەرتتەر كوزدەلگەن. ولارعا 1 ماۋسىمعا 641 ملرد تەڭگە بولىنگەن. ونىڭ 97،8%ء-ى يگەرىلگەن. يگەرىلمەگەنى – 14 ملرد تەڭگە. ەڭ كوپ يگەرىلمەۋ:  استانا قالاسىندا، قاراعاندى، جامبىل جانە الماتى وبلىستارىندا قالىپتاستى»، - دەدى ول.