قازاق پەن قىرعىز – ەجەلدەن ىرگەسى بولىنبەگەن، تاريحى مەن تاعدىرى ەگىز حالىق. قازىرگى تاڭدا وسى ىنتىماقتاستىقتىڭ ساباقتاستىعىن ساقتاپ، ودان ءارى دامىتۋ اسا ماڭىزدى. وسىنداي ماقساتپەن بىشكەكتە قازاق-قىرعىز جاستارىنىڭ العاشقى فورۋمى ءوتتى. ءبىرتۋعان ەلدەردىڭ بىرلىگىن بەكەمدەۋدى كوزدەگەن ءىس-شاراعا ءبىر توپ ارىپتەسىممەن بىرگە ءبىز دە ارنايى قاتىستىق.
پرەزيدەنتىمىز قاسىم-جومارت كەمەل ۇلى توقايەۆ قىرعىزستان – ەلىمىز ءۇشىن تەك وداقتاس قانا ەمەس، باۋىرلاس مەملەكەت ەكەنىن ۇنەمى ايتىپ كەلەدى. جوعارى دەڭگەيدەگى ەكىجاقتى بايلانىس قازاق-قىرعىز قارىم-قاتىناسىنىڭ بارلىق باعىتتا قارقىندى دامۋىنا نەگىز بولىپ وتىر.
وسى ورايدا جاستارىمىزدىڭ دا باس قوسىپ، ورتاق ماسەلەلەردى تالقىلاپ، وي-يدەيالارىمەن بولىسۋىنە جاعداي جاساۋ، ولاردىڭ دوستىقتارىن نىعايتۋ مەملەكەتتەر ءۇشىن ايرىقشا مانگە يە ەكەنىن اتاپ وتكەن ءجون.
جالپى، ءبىزدىڭ ورتاق تاريحىمىزدا ونەگە رەتىندە كورسەتۋگە تۇراتىن قارىم-قاتىناستار از ەمەس. بۇل رەتتە رۋحانيات پەن مادەنيەتتىڭ الار ورنى ەرەكشە. ونىڭ ىشىندە ايگىلى «ماناس» جىرىن العاش رەت شوقان ءۋاليحانوۆتىڭ قاعازعا تۇسىرگەنى، ءسۇيىنباي مەن ارىستانبەك، جامبىل مەن توقتاعۇل، كەنەن مەن وسمانقۇلداردىڭ بايلانىسى كوپكە ءمالىم.
مۇحتار اۋەزوۆ پەن شىڭعىس ايتماتوۆتىڭ جانە باسقا دا زيالى قاۋىم وكىلدەرىنىڭ دوستىق پەن تۋىسقاندىققا تابان تىرەگەن بايلانىستارى بارىمىزگە ۇلگى. وسىنداي جاقىندىق وسكەلەڭ ۇرپاق ءۇشىن ونەگە بولۋعا ءتيىس.
سوندىقتان جاستارىمىز بابالاردان امانات بولعان ىزگى ءداستۇردى لايىقتى جالعاپ، مادەنيەتپەن بىرگە ءعىلىم-بىلىم، يننوۆاسيا، بيزنەس جانە تاعى باسقا سالالاردا بىرلەسىپ ارەكەت ەتەدى دەپ سەنەمىز. فورۋمنىڭ باستى ماقساتى دا وسى.
قىرعىز ەلىنە ساپار بارىسىندا ايگىلى جازۋشى شىڭعىس ايتماتوۆتىڭ 95 جىلدىعىنا ارنالعان حالىقارالىق كونفەرەنسياعا دا قاتىستىق. ادامزاتتىڭ ايتماتوۆى اتانعان تۇلعانىڭ ونەگەلى ءومىرى مەن شىعارمالارى ەكى حالىقتىڭ اراسىنداعى «التىن كوپىرى» ەكەنى داۋسىز.
الەمدىك ادەبيەتتىڭ فەنومەنىنە اينالعان قالامگەردىڭ تۋىندىلارى نەگىزىنەن گۋمانيزم مەن ادامگەرشىلىكتى دارىپتەيدى. سوندىقتان ول شىعارمالار ەشقاشان ءوزىنىڭ وزەكتىلىگىن جوعالتپايدى. قايتا، بۇگىنگىدەي قۇندىلىقتار قۇنسىزدانعان، پوپۋليزم مەن جالعان ۇراندار بەلەڭ العان كەزەڭدە ولاردىڭ ماڭىزى ارتا تۇسەتىنى انىق. سوندىقتان ايتماتوۆتىڭ مۇراسىن دارىپتەۋ قازاق ءۇشىن دە ەرەكشە مانگە يە.
سونىمەن قاتار ساپار كەزىندە قىرعىزستان جوگوركۋ كەنەشىنىڭ قۇرىلعانىنا 85 جىل تولۋىنا وراي ۇيىمداستىرىلعان حالىقارالىق كونفەرەنسياعا جانە تمد پارلامەنتارالىق اسسامبلەياسىنىڭ 56-شى پلەنارلىق وتىرىسىنا قاتىستىق. سونداي-اق تمد ەلدەرىنەن كەلگەن ءبىرقاتار ارىپتەسىممەن ەكىجاقتى كەزدەسۋلەر وتكىزىپ، پارلامەنتارالىق ىنتىماقتاستىقتى نىعايتۋدى جانە وزگە دە ماڭىزدى ماسەلەلەردى تالقىلادىق.
الداعى ۋاقىتتا بۇل ساپار تامىرى ءبىر باۋىرلاس ەلدەردىڭ بەرەكە-بىرلىگىن ارتتىرۋعا ءوز سەپتىگىن تيگىزەدى دەپ سەنەمىز.