الەۋمەتتىك جەلىدە قۋاندىق بيشىمبايەۆتىڭ اكەسى ءۋاليحان بيشىمبايەۆ تاراز قالاسىندا ۋنيۆەرسيتەت اشادى دەگەن اقپارات تاراپ كەتتى.
عىلىم جانە جوعارى ءبىلىم مينيسترلىگى وسى اقپاراتقا قاتىستى تۇسىنىكتەمە بەردى، دەپ حابارلايدى aqshamnews.kz
جەلىدەگى اقپاراتتا Bishimbayev University جاڭا وقۋ جىلىنان باستاپ جۇمىس ىستەيتىنى، ونىڭ رەكتورى بولىپ ءۋاليحان بيشىمبايەۆتىڭ ءوزى تاعايىندالعانى ايتىلادى.
بۇل تۋرالى پىكىر بىلدىرگەن عىلىم جانە جوعارى ءبىلىم مينيسترلىگىنىڭ قوعاممەن بايلانىس دەپارتامەنتىنىڭ ديرەكتورى، باسپا ءسوز حاتشىسى ولجاس بەركىنبايەۆتىڭ سوزىنشە، قازاقستان رەسپۋبليكاسىنىڭ «ءبىلىم تۋرالى» زاڭىنىڭ 5-3-بابىنا سايكەس، كادرلار دايارلاۋ باعىتتارى مەن وقىتۋ نىساندارى بويىنشا جوعارى جانە جوعارى وقۋ ورنىنان كەيىنگى ءبىلىم بەرۋ سالاسىندا ءبىلىم بەرۋ قىزمەتىمەن اينالىسۋ ءۇشىن زاڭدى تۇلعالارعا ليسەنزيا جانە (نەمەسە) ليسەنزياعا قوسىمشانى بەرۋ – عىلىم جانە جوعارى ءبىلىم سالاسىنداعى ۋاكىلەتتى ورگاننىڭ قۇزىرەتىنە جاتادى.
"وسىعان بايلانىستى، جوعارى جانە جوعارى وقۋ ورنىنان كەيىنگى ءبىلىم بەرۋ سالاسىنداعى كەز كەلگەن ءبىلىم بەرۋ قىزمەتى مىندەتتى تۇردە ليسەنزيالانۋعا جاتادى. قازاقستان رەسپۋبليكاسىنىڭ «رۇقساتتار جانە حابارلامالار تۋرالى» زاڭىنا سايكەس، رۇقسات بەرۋ نەمەسە حابارلاما ءتارتىبى بەلگىلەنگەن قىزمەتتى نەمەسە ارەكەتتەردى (وپەراسيالاردى) جەكە جانە زاڭدى تۇلعالاردىڭ ءتيىستى رۇقسات الماي نەمەسە ءتيىستى حابارلامانى جىبەرمەي جۇزەگە اسىرۋىنا جول بەرىلمەيدى.
جوعارىدا ايتىلعانداردى نەگىزگە الا وتىرىپ، مينيسترلىك «Bishimbayev University» اتاۋىمەن ءبىلىم بەرۋ قىزمەتىن جۇزەگە اسىرۋعا ليسەنزيا بەرىلگەنىن جوققا شىعارادى، سونداي-اق «ە-ليسەنزيالاۋ» اقپاراتتىق جۇيەسىندە ءتيىستى ءوتىنىمنىڭ بولماعانىن حابارلايدى"، دەيدى بەركىنبايەۆ.