بۇگىن ءبىرقاتار ءماجىلىس دەپۋتاتى قازاقستاندا ءبىرىڭعاي ۋاقىت بەلدەۋىنە قاتىستى مالىمدەمە جاساپ، الداعى ۋاقىتتا ءماجىلىس قابىرعاسىندا تىڭداۋ وتكىزەتىندەرىن حابارلادى.
ءماجىلىس دەپۋتاتى لۇقبەك تۇماشينوۆ ساۋدا جانە ينتەگراسيا ءمينيسترى ارمان شاققالييەۆكە ۋاقىتتى وزگەرتۋ ماسەلەسىندە قازاقستاندىقتاردىڭ پىكىرى نەگە ەسكەرىلمەدى دەگەن ساۋالمەن جۇگىندى، دەپ حابارلايدى aqshamnews.kz.
ساۋدا ءمينيسترى ساعات بەلدەۋىن قايتارۋ ماسەلەسى 2-3 جىلدان كەيىن تالقىلانادى دەپ جاۋاپ بەردى. ءبىراق «امانات» پارتياسىنىڭ دەپۋتاتتارى كۇتۋگە دايىن ەمەس. ولار الداعى ۋاقىتتا بۇل ماسەلە بويىنشا ماجىلىستە ارنايى تىڭداۋ وتكىزۋدى جوسپارلاپ وتىر.
دەپۋتاتتاردىڭ ايتۋىنشا، جازدا وڭىرلەردى ارالاۋ كەزىندە شىعىس قازاقستان، اباي، سولتۇستىك قازاقستان، پاۆلودار، جەتىسۋ وبلىستارىندا تۇرعىنداردان ەڭ كوپ قويىلعان سۇراق وسى ۋاقىت بەلدەۋىنە قاتىستى بولعان.
"مىڭداعان حالىقتىڭ ارىز-شاعىمىنا قاراي مالىمدەمە جاساپ وتىرمىز. بۇگىن وسى ماسەلە بويىنشا Amanat فراكسياسىنىڭ ءماجىلىسىن وتكىزدىك. تۇرعىندار بۇرىنعى ۋاقىت بەلدەۋىن قايتارىپ بەرۋدى تالاپ ەتىپ وتىر. بۇل بەلدەۋ باتىس وڭىرلەر، قوستاناي، قىزىلوردا وبلىستارى ءۇشىن قولايلى شىعار، دەگەنمەن شىعىس ءۇشىن ءتيىمسىز"، – دەدى ءماجىلىس دەپۋتاتى ماقسات تولىقباي.
ارىپتەسىنىڭ ءسوزىن ءماجىلىس دەپۋتاتى داۋلەت مۇقايەۆ تا قولدادى.
"شىعىس قازاقستاندا 2.30-دا تاڭ اتادى. ادامدار سيىردىڭ موڭىرەگەن داۋىسىنان ويانادى. ال كەشكى 5-6-لاردا دالادا تاس قاراڭعى. ەكىنشى، ءۇشىنشى اۋىسىمدا وقيتىن وقۋشىلار قالاي ۇيىنە قايتادى؟ كوشەلەردە جارىق تا جوق. جەر ۇلكەن بولعاندىقتان، ءبىر ۋاقىت بەلدەۋى الدىن الا زەرتتەلۋى كەرەك ەدى"، – دەگەن ءماجىلىس دەپۋتاتى الدا جوسپارلانىپ وتىرعان تىڭداۋعا ۇكىمەت مۇشەلەرى، عالىمدار، سالا ماماندارى شاقىرىلاتىنىن ايتىپ، قازاقستاندىقتاردى دا ءوز ۇسىنىسىن بەرۋگە شاقىردى.
ۋاقىت - ۇكىمەتتىڭ دە، مەملەكەتتىڭ دە مەنشىگى ەمەس! ۇكىمەتتىڭ بۇل ماسەلە بويىنشا ناقتى شەشىم قابىلداۋىنا ىقپال ەتەمىز"، – دەپ تۇيىندەدى ماقسات تولىقباي.