وتاندىق جەڭىل ونەركاسىپ كاسىپورىندارى ءبىرىڭعاي مەكتەپ فورماسىن ەنگىزۋگە ارنالعان قاناتقاقتى جوبانىڭ اياسىندا ءوز ونىمدەرىن ۇسىندى، دەپ حابارلايدى Almaty-akshamy.kz Inform.kz-كە سىلتەمە جاساپ.
«ASTANA يۋتاريا ltd» وندىرىستىك يننوۆاسيالىق كومپانيانىڭ الاڭىندا ۇيىمداستىرىلعان ءىس-شاراعا مەملەكەتتىك ورگانداردىڭ، QazTextileIndustry جەڭىل ونەركاسىپ كاسىپورىندارى ۇلتتىق بىرلەستىگىنىڭ، سونداي-اق وندىرىستىك كومپانيالاردىڭ وكىلدەرى جانە مەكتەپ وقۋشىلارىنىڭ اتا-انالارى جينالدى.
يندۋستريالىق دامۋ كوميتەتىنىڭ ءتوراعاسى ءىلياس وسپانوۆتىڭ ايتۋىنشا، ءقازىر ەلىمىزدەگى مەكتەپ وقۋشىلارىن وتاندىق ونىممەن قامتاماسىز ەتۋ – باستى ماقساتتاردىڭ ءبىرى سانالادى.
«ءقازىر ەلىمىزدە كيىم ءوندىرىسى سالاسىندا 800-دەن استام كاسىپورىن جۇمىس ىستەپ كەلەدى. كوبىنە وتاندىق كيىم نارىعى نەگىزىنەن قاداعالاناتىن ساتىپ الۋ مەن مەملەكەتتىك تاپسىرىس قاجەتتىلىگىنە باعىتتالعان. 2021 جىلدىڭ قورىتىندىسى بويىنشا كيىم ءوندىرىسىنىڭ كولەمى 54،4 ملرد تەڭگەگە جەتىپ، ناقتى كولەم يندەكسى 102،3% دەڭگەيىندە بايقالدى. بۇل رەتتە 38 تىگىن كاسىپورنىندا مەكتەپ فورماسىن وندىرۋگە ارنالعان يندۋستريالىق سەرتيفيكات بار ەكەنىن ايتا كەتەيىك»، - دەدى ءى.وسپانوۆ.
