ءبىرقاتار مەملەكەتتىڭ ەلشىلەرى قازاقستان پرەزيدەنتىنە سەنىم گراموتالارىن تاپسىردى

سەنىم گراموتالارىن بىرىككەن اراب امىرلىكتەرىنىڭ ەلشىسى مۋحامماد سايد ال-اريكي، شۆەيساريانىڭ ەلشىسى ديەۆيد گريحتينگ، يرلانديا ەلشىسى  برايان ماكەلدافف، مەكسيكا ەلشىسى حوسە لۋيس مارتينەس ەرناندەس، جاڭا زەلانديا ەلشىسى سيالەي اللەگرا ۆان تۋر، البانيا ەلشىسى كاستريوت روبو، گرەنادا ەلشىسى ولەگ فيرەر، ماۆريتانيا ەلشىسى سيد’احمەد ءال بەكايە حامادي، تۋنيس ەلشىسى تاراك بەن سالەم، نورۆەگيا ەلشىسى دجون ميكال كۆيستاد جانە نيكاراگۋا ەلشىسى البا اسۋسەنا توررەس مەحيا تاپسىردى.

قاسىم-جومارت توقايەۆ ديپلوماتتاردى ەلىمىزدەگى ميسسيالارىنىڭ رەسمي باستالۋىمەن قۇتتىقتادى.

– سىزدەر تاياۋ شىعىس، ەۋروپا، لاتىن امەريكاسى، كاريب باسسەينى، افريكا جانە وكەانيا سياقتى الەمنىڭ ءار بولىگىنىڭ وكىلىسىزدەر. قازاقستان حالىقارالىق ىنتىماقتاستىقتى نىعايتۋدى جاقتايتىن ەل رەتىندە سىزدەردىڭ مەملەكەتتەرىڭىزبەن اراداعى دوستىق بايلانىستاردى ەكىجاقتى فورماتتا دا، كوپجاقتى فورماتتا دا ودان ءارى نىعايتۋعا دايىن، – دەدى پرەزيدەنت.

مەملەكەت باسشىسى ديپلوماتتاردىڭ نازارىن ەل تاۋەلسىزدىگىنىڭ 30 جىلدىق تاريحي كەزەڭىنە اۋداردى. سونداي-اق قازىرگى قازاقستاننىڭ كەمەلىنە كەلگەن، قالىپتاسقان، ىشكى جاعدايى تۇراقتى، ءالۋانتۇرلى ۇلتتار بىرلىگىنىڭ ءتيىمدى ۇلگىسىن كورسەتىپ وتىرعان، سونداي-اق قارقىندى ەكونوميكالىق ءوسىمى بار جانە تەڭگەرىمدى سىرتقى ساياسات ۇستاناتىن سىيلى مەملەكەت ەكەنىن اتاپ ءوتتى.

سونىمەن قاتار پرەزيدەنت ەلىمىزدىڭ قازىرگى سىن-قاتەرلەردى، ونىڭ ىشىندە كليماتتىڭ وزگەرۋىنەن تۋىنداعان قاۋىپتەردى ەڭسەرۋ جونىندەگى ادىستەرىنە توقتالدى. ونىڭ پىكىرىنشە، الداعى ۋاقىتتا گلازگودا وتەتىن جاھاندىق كونفەرەنسيادا قابىلداناتىن شەشىمدەردىڭ ورىندالۋى اسا ماڭىزدى بولماق. وسىعان بايلانىستى مەملەكەت باسشىسى قازاقستاننىڭ كومىرتەگىنە بەيتاراپ بولۋعا قول جەتكىزۋ جونىندەگى جوسپارىن ەسكە سالدى.

– وسى ايدا ءبىز كومىرتەگىنەن بەيتاراپ دامۋدىڭ 2060 جىلعا دەيىنگى تۇجىرىمداماسىن جۇزەگە اسىرۋعا كىرىسەمىز. جاسىل ەكونوميكانى قارجىلاندىرۋ جانە جاسىل تەحنولوگياعا قولجەتىمدىلىك اتالعان باستامانى ىسكە اسىرۋدا ماڭىزدى ءرول اتقارادى. ءباا، شۆەيساريا، يرلانديا، جاڭا زەلانديا جانە نورۆەگيا مەملەكەتتەرىمەن قاتار سىزدەردىڭ دە ەلدەرىڭىزبەن ىنتىماقتاستىقتى نىعايتامىز دەگەن ۇمىتتەمىز، – دەدى پرەزيدەنت.

قاسىم-جومارت توقايەۆ ازىق-تۇلىك جانە سۋ قاۋىپسىزدىگىن قامتاماسىز ەتۋدىڭ ماڭىزدىلىعىنا ءمان بەردى.

– قازاقستان ازىق-تۇلىك تاسىمالداۋدىڭ جاھاندىق جۇيەسىنە بەلسەندى اتسالىسادى. ءبىز اۋىل شارۋاشىلىعى سەكتورىن ەكولوگيالاندىرۋعا جانە تۇراقتى دامىتۋعا نيەتتىمىز. ازىق-تۇلىك قاۋىپسىزدىگى جونىندەگى يسلام ۇيىمىن  قۇرۋعا باستاماشى بولدىق جانە قازىرگى ۋاقىتتا وسى ۇيىمعا ءتوراعالىق ەتىپ وتىرمىز. ونىڭ قۇرامىنا 1،5 ميللياردقا جۋىق حالقى بار 36 ەل كىرەدى، – دەدى پرەزيدەنت.

مەملەكەت باسشىسى ەۋروپاداعى قاۋىپسىزدىك جانە ىنتىماقتاستىق ۇيىمىنىڭ 2010 جىلعى ءسامميتىنىڭ استانا دەكلاراسياسىندا ايتىلعان قاۋىپسىزدىك جونىندەگى ورتاق ءارى ءبىرتۇتاس ەۋرواتلانتيكالىق جانە ەۋرازيالىق قوعامدىستىققا بەيىل ەكەنىن ناقتىلاپ، البانيانىڭ 2020 جىلى ەقىۇ-عا ءتوراعالىق قىزمەتىن ءتيىمدى اتقارعانىن ايتتى.

پرەزيدەنت قاۋىپسىزدىكتى قامتاماسىز ەتۋ ماسەلەلەرى تۋرالى ايتا كەلىپ، ازيادا قاقتىعىستاردى بولدىرماۋ جانە بەيبىتشىلىكتى ساقتاۋ ەلىمىزدىڭ سىرتقى ساياساتىنداعى باسىمدىقتاردىڭ ءبىرى ەكەنىن جەتكىزدى. بۇل رەتتە، مەملەكەت باسشىسى قاۋىپسىزدىك ماسەلەلەرىن شەشۋ جونىندەگى ۇجىمدىق تاسىلدەردى پىسىقتاۋ ءۇشىن ءتيىمدى پلافتورما رەتىندە اوسشك-نىڭ ءرولىن اتاپ ءوتتى.

قاسىم-جومارت توقايەۆ اۋعانستانداعى جاعدايعا دا توقتالىپ، وسى ەلدىڭ جاڭا بيلىگىن زورلىق-زومبىلىقتى، زاڭسىز ەسىرتكى تاسىمالىن جانە باقىلاۋسىز كوشى-قوندى بولدىرماۋ جونىندەگى مىندەتتەرىن ورىنداۋعا شاقىردى.

سونىمەن قاتار مەملەكەت باسشىسى ەلشىلەرگە قازاقستاننىڭ اۋعانستانداعى جاعدايدى تۇراقتاندىرۋ جونىندەگى حالىقارالىق كۇش-جىگەرگە قوسقان ۇلەسى تۋرالى ايتتى.

– اۋعان حالقىنا گۋمانيتارلىق كومەك رەتىندە قۇنى 2،5 ميلليون دوللار بولاتىن 5 مىڭ توننا بيداي ۇنىن جەتكىزۋ ماسەلەسىن پىسىقتاپ جاتىرمىز. مۇنداي كومەك اتالعان ەلگە تۇراقتى تۇردە بەرىلىپ وتىرادى، – دەدى پرەزيدەنت.

قاسىم-جومارت توقايەۆ ءسوزىنىڭ سوڭىندا ديپلوماتتارعا تابىس تىلەپ، ولاردىڭ مەملەكەتتەرى مەن ۇكىمەتتەرىنىڭ باسشىلارىنا سالەمىن جولدادى.