انگليا، فرانسيا، يسپانيا جانە بىرنەشە ەل قىتايدا كوروناۆيرۋستىڭ جاڭا تولقىنىنىڭ باستالۋىنا الاڭداپ، وسى ەلدەن كەلگەن اۋە جولاۋشىلارى ءۇشىن تەست تاپسىرۋدى مىندەتتەدى، دەپ حابارلايدى Almaty-akshamy.kz Inform.kz-كە سىلتەمە جاساپ.
يزرايل مەن وڭتۇستىك كورەيا دا قىتايلىقتار ءۇشىن كوۆيد شەكتەۋلەرىن قايتاراتىنىن جاريالادى. بۇعان دەيىن اقش، ءۇندىستان جانە يتاليا قىتايدان كەلگەن جولاۋشىلارعا تەستتى قايتا قولعا الدى.
ۇلىبريتانيا تەستتى 8 قاڭتاردان باستاپ ەنگىزدى. ەل ۇكىمەتى قىتايدان تۇسكەن ەپيدەميولوگيالىق اقپاراتتىڭ جەتىسپەۋىنەن وسىنداي شەشىم قابىلداۋعا ءماجبۇر بولعان.
تەستتى تەك انگليا اۋەجايلارىندا كورسەتۋ قاجەت، الايدا قازىرگى تاڭدا قىتايدان شوتلانديا، ۋەلس نەمەسە سولتۇستىك يرلاندياعا تىكەلەي رەيس جوق.
فرانسيا قىتايدان كەلگەن اۋە جولاۋشىلارىنان ۇشۋدان 48 ساعات بۇرىن جاسالعان كوروناۆيرۋس تەستىن تالاپ ەتەدى.
ال يسپانيا ۆاكسينانى تولىق العان قىتايلىقتارعا ەلگە تەستسىز كىرۋگە رۇقسات ەتتى.
يتاليا مەن يسپانيا بولسا، جولاۋشىلار ەلگە كەلگەن بويدا اۋەجايدا ۆيرۋسقا سىناما الادى.
فرانسيا مەن يسپانيا پاندەميالىق شەكتەۋلەردى قاشان قايتاراتىنىن ناقتىلامادى.
جۇڭگو ۇكىمەتى كۇن سايىن بەس مىڭنان استام ادام كوروناۆيرۋس جۇقتىرىپ جاتقانىن حابارلادى، ءبىراق كوپتەگەن تالداۋشىلار بۇل ساننىڭ تومەندەتىلگەنىن، شىندىعىندا جاڭا جاعدايلار كورسەتكىشى ميلليونعا جەتەدى دەپ ەسەپتەيدى.
گەرمانيا، اۋستراليا مەن پورتۋگاليا جاڭا انتيۆيرۋس شارالارى ازىرگە ەنگىزىلمەيتىنىن ءمالىم ەتتى.