تۇركياعا ۇشىپ شىقپاۋعا كەڭەس بەرىلدى
كەيىنگى تاۋلىك ىشىندە تۇركيادا بالالارى وقىپ جاتقان بىرنەشە قازاقستاندىق وتباسى سىرتقى ىستەر مينيسترلىگىنە جۇگىنگەن. بۇل جايىندا ۆەدومستۆونىڭ رەسمي وكىلى ايبەك سمادياروۆ ب ا ق وكىلدەرىمەن وتكەن بريفينگتە ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«كەيىنگى تاۋلىك ىشىندە بىرنەشە وتباسى تۇركيادا وقىپ جاتقان بالالارىن ىزدەپ جۇگىندى. ءقازىر ول اقپاراتتىڭ ءبارى تەكسەرىلىپ جاتىر. ازىرگە ناقتى ەشتەڭە ايتا المايمىن. ويتكەنى، بىلەسىزدەر، گۋمانيتارلىق اپات بولعان كەزدە جەرگىلىكتى بيلىكپەن بايلانىس ورناتۋ بويىنشا كەيبىر قيىندىقتار تۋىندايدى. جالپى، تۇرىك بيلىگى ءبىزدىڭ ازاماتتار بار بولسا نەمەسە جوق بولسا، ول تۋرالى دەرەۋ حابارلايدى. تۇرىك بيلىگىمەن جاقسى بايلانىس ورناتىلعان»، - دەدى ايبەك سمادياروۆ.
سونداي-اق، ول قازاقستاندىقتارعا تۇركياداعى تۋىستارىن ىزدەپ، ول ەلگە ۇشىپ شىقپاۋعا كەڭەس بەردى.
«ەگەر ازاماتتارىمىز تۇركياداعى تۋىستارىن ءوز بەتىمەن ىزدەۋ ءۇشىن شىققىسى كەلسە، ولاي ىستەۋدىڭ قاجەتى جوق. ويتكەنى، ىستامبۇل قالاسىنىڭ اۋەجايىنداعى جاعدايدى ۆيدەودان كوردىك. مىڭداعان ادام ۇشىپ شىعۋعا دايىن ءجۇر. ءبىراق، العاشقى كەزەڭدە ول جاقتا ءبىر جەردەن بىردەڭە تابۋ قيىن بولادى. ماماندار وسى ماسەلەمەن اينالىسىپ جاتقاندىقتان، كۇتۋ كەرەك. ءتىپتى، ولار قيراعان ورىندارعا جىبەرىلمەۋى دە مۇمكىن. ويتكەنى، ولاردىڭ ءتيىستى بىلىكتىلىگى جوق»، - دەدى ءسىم رەسمي وكىلى.
ەسكە سالساق، تۇركيانىڭ وڭتۇستىك-شىعىسىندا بولعان ءزىلزالادان قازا تاپقاندار سانى 2 921 ادام ەكەنى حابارلانعان ەدى. سوڭعى دەرەكتەر بويىنشا، اپاتان زارداپ شەككەندەر سانى 3 419-عا جەتكەن.