قۇتتىقتاۋ جەدەلحاتتارى ءالى دە كەلىپ تۇسۋدە.
قۇتتىقتاۋ جولداعاندار اراسىندا اقش پرەزيدەنتى دجو بايدەن، وزبەكستان پرەزيدەنتى شاۆكات ميرزيويەۆ، تاجىكستان پرەزيدەنتى ەمومالي راحمون، ازەربايجان پرەزيدەنتى يلحام الييەۆ بار.
ناۋرىز مەرەكەسىنە وراي قاسىم-جومارت توقايەۆتىڭ اتىنا شەت مەملەكەتتەردىڭ باسشىلارىنان، حالىقارالىق ۇيىمداردىڭ جەتەكشىلەرىنەن قۇتتىقتاۋ جەدەلحاتتارى كەلىپ تۇسۋدە، دەپ حابارلايدى Almaty-akshamy.kz اقوردانىڭ باسپا ءسوز قىزمەتىنە سىلتەمە جاساپ.
اقش پرەزيدەنتى دجو بايدەن ءوز قۇتتىقتاۋىندا مەملەكەت باسشىسىنا دەنساۋلىق جانە قازاقستان حالقىنا باق-بەرەكە تىلەگەن.
"بەيبىتشىلىك پەن جاڭارۋعا ۇندەيتىن بۇل كۇنى قۇراما شتاتتارداعى جانە بۇكىل الەمدەگى كوپتەگەن ادام وسىناۋ كەرەمەت مەيرامدى سىزبەن بىرگە تويلايدى. قازاقستان مەن اقش 30 جىلدان بەرى بەرىك ءارى تۇراقتى سەرىكتەستىككە نەگىزدەلگەن ديپلوماتيالىق قاتىناستاردى جالعاستىرىپ كەلەدى. مەنىڭ اكىمشىلىگىم حالقىڭىزدىڭ ەكونوميكالىق، الەۋمەتتىك جانە ساياسي مۇمكىندىكتەرىن قالىپتاستىرۋدى كوزدەيتىن رەفورمالارىڭىزدىڭ باعدارلاماسىنا قولداۋ كورسەتەدى. ناۋرىز قۇتتى بولسىن!" – دەلىنگەن دجو بايدەننىڭ جەدەلحاتىندا.
وزبەكستان پرەزيدەنتى شاۆكات ميرزيويەۆ ناۋرىز مەرەكەسى ورتالىق ازيا حالىقتارىنىڭ ورتاق ماقساتى مەن ارمانىن بىلدىرەتىن مەيرام ەكەنىن اتاپ وتكەن.
" ادامزات تاريحىندا ۇلكەن ورىن الاتىن وسى ايتۋلى مەرەكە حالىقتارىمىز بەن ەلدەرىمىز اراسىنداعى دوستىق ارقاۋىن بەكەمدەۋگە، ىنتىماقتاستىق پەن ۇيلەسىمدى قاتىناستاردى نىعايتۋعا ولشەۋسىز ۇلەس قوسادى. ءبىز ەكى ەل اراسىنداعى ءوزارا سەنىم مەن قۇرمەتكە نەگىزدەلگەن تاتۋ كورشىلىك بايلانىستارىمىزدى، ستراتەگيالىق سەرىكتەستىگىمىز بەن وداقتاستىق قاتىناستارىمىزدى ودان ءارى كەڭەيتە بەرەتىنىمىز ءسوزسىز"، – دەلىنگەن قۇتتىقتاۋ حاتتا.
تاجىكستان پرەزيدەنتى ەمومالي راحمون ءوز قۇتتىقتاۋىندا قازىرگى كۇردەلى الەۋمەتتىك-ەكونوميكالىق جانە گەوساياسي جاعدايدا ءوزارا قۇرمەت پەن قولداۋدىڭ، دوستىق پەن بىرلىكتىڭ، بەيبىتشىلىك پەن تۇراقتىلىقتىڭ، ورلەۋ مەن جاسامپازدىقتىڭ بيىك ماقساتتارىنا ۇندەيتىن كوكتەم مەرەكەسىنىڭ جالپىادامزاتتىق قۇندىلىقتارىنىڭ ءمانى ارتا تۇسەتىنىن جازعان.
"قاستەرلى ناۋرىز مەرەكەسىنىڭ ىزگى داستۇرلەرىنە نەگىزدەلگەن تاجىكستان مەن قازاقستان اراسىنداعى دوستىق، ستراتەگيالىق سەرىكتەستىك قاتىناستارى حالىقتارىمىزدىڭ تۇپكى مۇددەلەرىنە سايكەس الداعى ۋاقىتتا دا دامىپ، كەڭەيە بەرەدى"، – دەپ جازعان ەمومالي راحمون.
ازەربايجان پرەزيدەنتى يلحام الييەۆتىڭ قۇتتىقتاۋ جەدەلحاتىندا ازەربايجان مەن قازاقستان اراسىنداعى دوستىق، تاتۋ كورشىلىك جانە ىنتىماقتاستىق بۇگىندە ناۋرىز مەيرامىنىڭ ەجەلگى داستۇرلەرىن ساقتاپ كەلە جاتقان حالىقتارىمىزدىڭ مۇددەسى جولىندا ودان ءارى دامىپ، نىعايا تۇسەتىنىنە سەنىم ءبىلدىردى.
"ءوزىمنىڭ جانە ازەربايجان حالقىنىڭ اتىنان ءسىزدى جانە حالقىڭىزدى قاسيەتتى ناۋرىز مەيرامىمەن شىن جۇرەكتەن قۇتتىقتايمىن. بۇل مەرەكە – تابيعاتقا دەگەن شەكسىز ماحاببات پەن ۇلكەن قۇرمەتتىڭ بەلگىسى. مىڭداعان جىلدار بويى سىناققا ءتوزىپ كەلگەن ومىرلىك فيلوسوفيانىڭ نىشانى"، – دەلىنگەن قۇتتىقتاۋ جەدەلحاتتا.
پرەزيدەنت قاسىم-جومارت توقايەۆتىڭ اتىنا ءوز قۇتتىقتاۋلارىن تۇركى مەملەكەتتەرى ۇيىمىنىڭ باس حاتشىسى باعدات امىرەيەۆ، كاۆكاز مۇسىلماندار باسقارماسىنىڭ ءتوراعاسى، تمد ءدىنارالىق كەڭەسىنىڭ ءتوراعالىعىن قوسا اتقارۋشى شەيح-ۋل-يسلام اللاحشۇكىر پاشە-زادە، "شيەۆرون" كورپوراسياسى ەۋرازيالىق بولىمشەسىنىڭ باسقارۋشى ديرەكتورى دەرەك ماگنەسس، ەۋرازيالىق دامۋ بانكىنىڭ باسقارما ءتوراعاسى نيكولاي پودگۋزوۆ، بايقوڭىر قالاسى قالالىق اكىمشىلىگىنىڭ باسشىسى كونستانتين بۋسىگين جانە باسقالارى جولدادى.