بىرنەشە الاياقتىققا قاتىسى بار ايەل قولعا ءتۇستى

الاياقتىعىن مويىنداعان ول ۋاقىتشا ۇستاۋ يزولياتورىنا قامالدى.

الماتىدا بىرنەشە الاياقتىققا قاتىسى بار كۇدىكتى ايەل ۇستالدى، دەپ حابارلايدى Almaty-akshamy.kz Polisia.kz-كە سىلتەمە جاساپ.

سەريالىق الاياقتىق دەرەگىن مەدەۋ اۋدانىنىڭ پوليسيا قىزمەتكەرلەرى انىقتادى.

«تەرگەۋ بارىسىندا كۇدىكتى 29 جاستاعى ك. ەسىمدى ازاماتشا قىلمىستىق جولمەن بايۋ ماقساتىندا سەنگىش كاسىپكەرلەردى الداعاندىعى انىقتالدى: تابىستى كوبەيتىپ بەرەمىن دەگەن جەلەۋمەن «مەگاتاۋ»، «گۋم»، «موبيلا» دۇكەندەرىنىڭ 15 ساتۋشىسىنىڭ اقشاسىن العان. بۇگىنگى تاڭدا ك. ەسىمدى ازاماتشا ۇستالدى جانە بىرنەشە رەت الاياقتىق جاساعانىن مويىندادى. ول ق ر قپك-نىڭ 128-بابىنا سايكەس، ۋاقىتشا ۇستاۋ يزولياتورىنا قامالدى. قىلمىستىق ءىس ق ر قك-نىڭ 190-بابى 3-بولىگىنىڭ 1،4-تارماقتارى (الاياقتىق) بويىنشا تىركەلدى»، – دەدى مەدەۋ اۋداندىق پوليسيا باسقارماسىنىڭ باسشىسى داۋرەن وتەبايەۆ.

قازىرگى ۋاقىتتا ك. ەسىمدى ازاماتشانىڭ الماتى قالاسىندا وسىعان ۇقساس، بۇرىن جاسالعان قىلمىستارعا قاتىستىلىعى تەكسەرىلۋدە.

پوليسيا كۇدىكتىنىڭ قىلمىستىق ارەكەتتەرىنەن زارداپ شەككەن ازاماتتاردىڭ مىنا تەلەفون نومىرلەرىنە حابارلاسۋىن سۇرايدى: 8 (727) 254-48-02؛ 254-48-10 جانە 8-702-476-66-60.