1-مامىر – بىرلىك كۇنى
1 مامىر – قازاقستان حالقىنىڭ بىرلىگى كۇنى. بۇل اتاۋلى كۇن دوستىق پەن تاتۋلىقتى باستى باعدار ەتكەن ەل حالقى ءۇشىن ايرىقشا مانگە يە. الماتى ىرگەسىندەگى ەلدىمەكەندەردىڭ بىرىندە ءار ۇلت وكىلدەرى جينالعان، ءتۇرلى تاعدىر توعىسقان ءبىر كوشە بار. بەرەكەلى دە مەرەكەلى بۇل كوشە – پانفيلوۆ اۋىلىنداعى ق.قۇرمانوۆ كوشەسى. وندا قازاقتارمەن بىرگە گرەك، ۇيعىر، ورىس، تاتار، تۇرىك ۇلتتارىنىڭ وكىلدەرى ءبىر ءۇيدىڭ بالاسىنداي ءتاتۋ-تاتتى ءومىر ءسۇرىپ كەلەدى.
ەلىمىزدە ءسانتۇرلى ەتنوس وكىلدەرىنىڭ تاعدىرىن تاريحتىڭ اششى پاراقتارى توعىستىردى دەۋگە بولادى. سوناۋ اشارشىلىق پەن قۋعىن-سۇرگىن كەزەڭدەرى، جاپپاي دەپورتاسيالاۋ جىلدارى قازاقتىڭ كەڭ قۇشاعىنا الەمنىڭ ءار حالقى كەلىپ پانالاعان ەدى. ءداۋىردىڭ الماعايىپ كەزەڭدەرىنەن وتكەن سايىن سولار ءبىر اتانىڭ باسىنداي، ءبىر قولدىڭ سالاسىنداي ءوزارا باۋىر باسىپ، ارالاسىپ كەتكەن. ءبىز ايتىپ وتىرعان قۇرمانوۆ كوشەسىندەگى رياسىز كارتينا وسىنى ايعاقتاسا كەرەك.
ءار وتباسىنىڭ ءوز تاعدىرى، ءوز ءومىر جولى بار. ءبىراق بارلىعىن بىرىكتىرەتىن قاسيەت – ءوزارا سىيلاستىق پەن دوستىق. ايتۋعا تۇرارلىق ەڭ ءبىر ارتىقشىلىعى – مۇنداعى ءار وتباسى كورشىسىن جاقىن تۋىسىنداي قادىرلەيتىنى. ول بولسا كۇندەلىكتى قاراپايىم ىس-ارەكەتتەردەن كورىنىپ جاتادى. كەيدە كوشەدە بالالار ويناپ ءجۇرىپ، ۆەلوسيپەدتەرى مەن ويىنشىقتارىن ۇمىتىپ كەتسە، كورشىلەر ولاردى ءوز ۇيلەرىنە كىرگىزىپ قويادى. ەگەر بىرەۋ قاقپاسىن اشىق قالدىرسا، وزگەلەرى ءۇنسىز جاۋىپ كەتەدى. كەز كەلگەن ورتاق ماسەلە بولسا، تۇرعىندار بىرلەسە وتىرىپ شەشەدى. سوندىقتان دا بۇل كوشە شىنايى بىرلىكتىڭ مەكەنىنە اينالعان.
جاڭارۋ مەن ىزگىلىك شۋاعى سىندى ناۋرىز مەرەكەسى كەلگەندە بۇل كوشەدە بەرەكەنىڭ قازانى ءتىپتى دە قايناي تۇسەدى. مەرەكەلىك باسقوسۋلاردا كوشە تۇرعىندارى ءبىر قازاننان اس ءىشىپ، القا-قوتان وتىرىسىپ، شۇيىركەلەسىپ تاراسادى.
قۇرمانوۆ كوشەسىندە زاماناۋي جاعداي جاسالعان: اسفالت جولدارى تەگىس، تۇندە كوشەنى جارىق شامدار نۇرعا بولەيدى. ءقازىر كوشە بويىنداعى ءار اۋلادا گۇلدەر ەگىلۋدە. اينالانى كوگالداندىرۋ ىسىنە دە تۇرعىندار بىرگە اتسالىسىپ جاتىر. مۇندا ءار كوكتەم – جاڭا ءۇمىتتىڭ، جاڭا دوستىقتىڭ باستاۋى سەكىلدى.
سوفيا مەن اناستاس دەلەوريديستەر (گرەك وتباسى):
– ءبىز بۇل كوشەدە 50 جىلدان بەرى تۇرامىز. العاش كەلگەندە اينالا اشىق دالا ەدى. قازاق حالقى ءبىزدى باۋىرىنداي قارسى الدى، قيىن-قىستاۋ كۇندەردە قولداۋ كورسەتتى. سول كۇندەر ءۇشىن العىسىمىز شەكسىز. بۇگىندە كورشىلەرىمىز بىزگە تۋىستاي بولىپ كەتكەن. قۋانىشتا دا، قايعىدا دا بىرگەمىز. ءبىزدىڭ باستى بايلىعىمىز – بىرلىك پەن بەيبىتشىلىك.
ايۋپجان مەن گۇلباحرام سەسكايەۆتار (ۇيعىر وتباسى):
– ۇلتىمىز ءارتۇرلى بولسا دا، جۇرەگىمىز ءبىر. ءبىزدىڭ كوشەدە ەڭ باستىسى – ادامنىڭ ۇلتى ەمەس، ونىڭ ادامگەرشىلىگى ماڭىزدى. ءتۇرلى جاعدايلار تۋىنداسا دا، بىر-بىرىمىزگە قولۇشىن بەرۋدى قاشاندا ءبىرىنشى ورىنعا قويىپ كەلەمىز. ينشاللا، وسى بەرەكە-بىرلىگىمىزدەن ايىرماسىن دەپ تىلەك تىلەپ وتىرامىز.
رۇستەم مەن زاۋرەش كۇرتىبايەۆتار (قازاق وتباسى):
– قازاق جەرى ءتۇرلى ۇلتتاردى باۋىرىنا باسقان اسىل مەكەن. ءبىز دە كورشىلەرىمىزبەن ءبىر شاڭىراق استىندا ءومىر ءسۇرىپ كەلەمىز. ءوزىم مەدبيكە رەتىندە ءاردايىم كورشىلەرىمە كومەك قولىن سوزۋعا دايىنمىن. ءبىزدىڭ بالالارىمىز دا ۇلتقا بولىنبەي بىرگە ويناپ، بىرگە ءوسىپ كەلەدى. بەيبىت ءومىر مەن تاتۋلىقتىڭ شىنايى كورىنىسى وسى بولار.
ءتۇيىن: ءتۇرلى تاعدىرلار توعىسىپ، تاتۋلىق ورتاسىنا اينالعان مەكەندە ەڭ باستىسى، نيەت پەن ارماندار توعىسقان. مۇنداعى تۇرعىندار دوستىق پەن ءوزارا سىيلاستىقتى ءومىر زاڭى رەتىندە قابىلداعان. ەندەشە، 1 مامىر – تەك مەرەكە ەمەس، جۇرەكتەردىڭ ۇندەسكەن كۇنى. ءارتۇرلى ۇلت وكىلدەرىنىڭ ءبىر كوشەدە ءبىر وتباسىداي تاتۋ ءومىر ءسۇرۋى – قازاقستانداعى بەيبىت ءومىر مەن كەلىسىمنىڭ جارقىن بەلگىسى. قۇرمانوۆ كوشەسىنىڭ ىنتىماعى ءار اۋلاعا، ءار كوشەگە ۇلگى بولسا ەكەن دەيمىز.