ءبىلىم كۇنى دە جاقىنداپ كەلەدى.
1 قىركۇيەكتە مىڭداعان بالا مەكتەپ تابالدىرىعىن اتتاپ، ءبىرىنشى سىناپقا بارادى، دەپ حابارلايدى aqshamnews.kz
وقۋ-اعارتۋ مينيسترلىگى اتا-انانىڭ مەكتەپ جاسىنا كەلگەن بالانى وقۋعا دايىنداۋ ءۇشىن نە ىستەۋ كەرەكتىگى تۋرالى مالىمەت جاريالادى. بۇل كەڭەستى كوپشىلىككە پراكتيكالىق پسيحولوگ ايگەرىم داۋلەت ايتىپ بەردى.
«مەكتەپكە دايىنداۋ بالا مەن ونىڭ وتباسى ومىرىندەگى ماڭىزدى كەزەڭ. وعان قاجەتتى داعدىلار مەن بىلىمدەردى مەڭگەرۋ عانا ەمەس، ءومىردىڭ جاڭا كەزەڭىنە پسيحولوگيالىق دايىندىق تا قاجەت»، - دەدى ول.
ول ءبىرىنشى سىنىپ وقۋشىلارىنىڭ اتا-انالارىنا ارنالعان نەگىزگى قادامدار مەن ۇسىنىستاردىڭ بەس نەگىزگى ءبولىمدى قامتيتىنىن اتاپ ءوتتى.
قاجەتتى داعدىلاردى دامىتۋ
ءبىرىنشى كەزەكتە بالانى ءوز بەتىنشە كيىنۋگە، باۋىن بايلاۋعا، تۇيمەلەرىن تۇيمەلەۋگە ۇيرەتىڭىز. جۋىنۋ، تىستەرىن تازالاۋ، زاتتارىن جيناۋ سياقتى وزىنە ءوزى قىزمەت كورسەتۋ داعدىلارىن قالىپتاستىرىڭىز. اداممەن قالاي تانىسۋ كەرەك، قۇرداستارىمەن جانە ەرەسەكتەرمەن قالاي قارىم-قاتىناس قۇرۋ داعدىلارىن دامىتۋعا تىرىسىڭىز. بالانىڭ ءوز سەزىمدەرى مەن قاجەتتىلىكتەرىن سوزبەن بىلدىرۋگە ۇيرەتىڭىز. بالانىڭ نەگىزگى تۇستەر مەن پىشىندەردى، ارىپتەردى، سانداردى ۇيرەنۋىنە كومەكتەسىڭىز.
ۇساق موتوريكانى جاتتىقتىرىڭىز. مۇسىندەۋ، سۋرەت سالۋ، زايكامەن جۇمىس ىستەۋ سياقتى جۇمىسپەن كوبىرەك اينالىسىڭىز.
پسيحولوگيالىق دايىندىق
مەكتەپ تۋرالى جاقسى پىكىر ايتىڭىز. بالاڭىزعا ونىڭ كوپتەگەن جاڭا جانە قىزىقتى نارسەلەردىڭ كۇتىپ تۇرعانىن جەتكىزىڭىز. وعان جاڭا دوستار مەن قىزىقتى ساباقتاردىڭ بولاتىنىن ءتۇسىندىرىڭىز. بالاڭىزدى مەكتەپتەگى ءتارتىپ ەرەجەلەرىمەن تانىستىرىڭىز. ساباقتا، اسحانادا جانە ءۇزىلىس كەزىندە ءوزىن قالاي ۇستاۋ كەرەكتىگىن ءتۇسىندىرىڭىز. كۇن ءتارتىبىن، ەرتە تۇرۋدى، تۇراقتى تاماقتانۋ مەن ۇيقى ۋاقىتىن بىركەلكى ەنگىزىڭىز.
قولايلى ورتا جاساۋ
وقۋعا ىڭعايلى ورىن دايىنداڭىز. ۇستەل، ورىندىق، كىتاپتار مەن كەرەك-جاراقتارعا ارنالعان سورەلەرىن الدىن الا دايىنداپ قويىڭىز. جاقسى جارىقتاندىرۋ جاعدايلارىمەن قامتاماسىز ەتىڭىز.
مەكتەپكە قاجەتتى زاتتاردى ساتىپ الىڭىز. ريۋكزاك، داپتەر، قالامدار مەن قارىنداشتار. بالانىڭ وقۋعا دەگەن قىزىعۋشىلىعى مەن ىنتاسى بولۋى ءۇشىن كەيبىر نارسەلەرلەردى ءوزى تاڭداۋعا مۇمكىندىك بەرىڭىز.
الەۋمەتتىك بەيىمدەلۋ
مۇمكىن بولسا، بولاشاق سىنىپتاستارىمەن جانە مۇعالىممەن الدىن الا تانىستىرىڭىز. بالاعا مەكتەپتى ارالاتىپ، كورسەتىڭىز. سوندا ول نەنىڭ قايدا ەكەنىن بىلەتىن بولادى.
بالاڭىزدىڭ مازاسىزدىعىن ازايتۋ ءۇشىن مەكتەپ تۋرالى بارلىق سۇراقتارىنا جاۋاپ بەرىڭىز. ونىڭ قورقىنىشتارى مەن كۇماندارىن جويۋعا تىرىسىڭىز. بۇل ءومىردىڭ قالىپتى ەكەنىن كورسەتۋ ءۇشىن مەكتەپتەگى تاجىريبەڭىز تۋرالى اڭگىمەلەسىڭىز.
قولداۋ جانە نازار اۋدارۋ
مەكتەپكە بارعان العاشقى كۇندەرى بالاڭىزعا ونىڭ مەكتەپ تۋرالى اڭگىمەلەرىنە كوڭىل ءبولىپ، قىزىعۋشىلىق تانىتۋ ارقىلى قولداۋ كورسەتىڭىز. بالاڭىزدى تىڭداۋعا جانە وعان جاڭا ورتاداعى جاعدايىن تۇسىنۋگە كومەكتەسۋگە دايىن بولىڭىز.
ەستە ساقتاڭىزدار! ءاربىر بالانىڭ ەرەكشەلىكتەرىنە ساي ونىڭ مەكتەپكە بەيىمدەلۋى ءبىر ايدان التى ايعا دەيىن سوزىلۋى مۇمكىن. ونىڭ قاجەتتىلىكتەرى مەن ەموسيالارىنا مۇقيات بولۋ قيىندىقتاردى ەسكەرۋگە كومەكتەسۋ جانە جەتىستىكتەرىنە قۋانۋ وتە ماڭىزدى.