الماتىدا 2030 جىلعا دەيىن تاعى 20 جاڭا كىتاپحانا اشىلادى.
بۇل رەتتە جوسپار قالانىڭ كىتاپحانا تاپشىلىعى بار شالعاي اۋداندارىنا باعىتتالاتىن بولادى، دەپ حابارلايدى akshamnews.kz
سونىمەن قاتار، ساياباقتاردا، سكۆەرلەردە جانە ساۋدا ورتالىقتارىندا كىتاپحانا پاۆيلوندارى اشىلاتىن بولادى. وسىلايشا، الماتى ءبىزدىڭ ەلىمىزدە مۇنداي رۋحاني جوبانى جوسپارلاپ ۇسىنۋعا دايىن العاشقى قالا بولىپ وتىر.
بۇل ورايدا مادەنيەت باسقارماسىندا كىتاپحانا سالاسى مەن باسقا دا شىعارماشىلىق شەشىمدەر تۋرالى ايتىلدى. ب ا ق وكىلدەرى ءۇشىن كىتاپحانالار بويىنشا باسپا ءسوز تۋرى ۇيىمداستىرىلدى. ايتا كەتەيىك، بيىل الماتى كىتاپحانالارى 40 جىلدىعىن اتاپ وتۋدە.
ءقازىر مادەني استانامىز الماتىدا 28 قالالىق كىتاپحانا بار. ونىڭ ىشىندە ءۇش فيليال تاۋلىك بويى جۇمىس ىستەيدى. وقىرماندار ءۇشىن قولايلى جاعدايلار
جاسالعان: كىتاپ قورى ۇنەمى جاڭارتىلىپ وتىرادى. مۇندا جىلدام تەگىن ينتەرنەت جۇمىس ىستەيدى، كومپيۋتەرلەر، جۇمىس ۇستەلدەرى بار.
سونىمەن قاتار، كورۋ قابىلەتى ناشار جانە زاعيپ وقىرماندار كىتاپحانالاردىڭ ارنايى قىزمەتتەرىن پايدالانا الادى. ول ءۇشىن «برايل» پەرنەتاقتالارى، ارنايى ەكراندىق ۇلكەيتكىشتەر جانە سكانەرلەر بار. ولار كىتاپتاردىڭ مازمۇنىن بىردەن «برايلعا» اۋدارۋعا كومەكتەسەدى.
«ءبىز قالامىزدىڭ زاعيپتار قوعامىمەن، سونداي-اق ءتۇرلى ينكليۋزيۆتى ۇيىمدارمەن تىعىز ىنتىماقتاستىق جاسايمىز. سونىمەن قاتار، بالالاردىڭ كىتاپ وقۋعا دەگەن ىنتاسىن ارتتىرۋ بويىنشا جۇمىستار جۇرگىزىلۋدە. ول ءۇشىن تەگىن ءتىل ۇيىرمەلەرىن، گەيميفيكاسيا ەلەمەنتتەرى بار ءتۇرلى ءىس-شارالاردى ۇيىمداستىرامىز، زيالى تۇلعالاردى، ونەر جۇلدىزدارى مەن قالامگەرلەردى شاقىرامىز. بىزدە بارلىعى 140 ۇيىرمە بار. جالپى، قالالىق كىتاپحانالاردىڭ 95% - ى جاڭعىرتۋدان ءوتتى. ءاربىر كىتاپحانامىز بالالار مەن ەرەسەكتەر ءۇشىن جان-جاقتى دامۋ ورتالىعى بولىپ تابىلادى. وسىنىڭ ارقاسىندا قالالىق كىتاپحانالارعا كەلۋشىلەر سانى جىل سايىن 3 ميلليوننان كەم ەمەس"، - دەپ اتاپ ءوتتى الماتى قالاسىنىڭ ورتالىقتاندىرىلعان كىتاپحانا جۇيەسىنىڭ ديرەكتورى مەيرام بەكتەمبايەۆ.
قالانىڭ ورتالىقتاندىرىلعان كىتاپحانا جۇيەسىندەگى كىتاپ قورى 1 300 000 دانادان اسادى، ونىڭ 18% - ى تولىعىمەن سيفرلانعان. سونىمەن قاتار، كىتاپ كاتالوگى وكج سايتىندا ورنالاستىرىلعان جانە بارلىق وقىرمانعا قولجەتىمدى. سونداي-اق، قازىرگى ۋاقىتتا مۇمكىندىگى شەكتەۋلى ازاماتتار ءۇشىن ۇيگە كىتاپ جەتكىزۋ قىزمەتى تەستىلەۋدەن ءوتىپ جاتىر.
باسپا ءسوز تۋرى بارىسىندا جۋرناليستەر كىتاپحانا قىزمەتكەرلەرىمەن جۇزدەسىپ، ءتۇرلى فيليالدارعا بارىپ، قوردا ساقتالعان باسىلىمدارمەن تانىستى. № 10 كىتاپحانا مەڭگەرۋشىسى نادەجدا تەن كىتاپحانالاردىڭ حالىقارالىق ىنتىماقتاستىعى تۋرالى ايتىپ بەردى. الماتى كىتاپحاناشىلارى بيىل شۆەيساريا، گەرمانيا، جاپونيا، وڭتۇستىك كورەيا جانە گرۋزيانىڭ جەتەكشى كىتاپحانالارىندا بىلىكتىلىگىن ارتتىرۋدان ءوتتى.
«كىتاپحاناشىلاردىڭ بىلىكتىلىگىن ارتتىرۋ جانە تاجىريبە الماسۋ ماقساتىندا قىزمەتكەرلەرىمىز الەمنىڭ جەتەكشى ءبىلىم بەرۋ ورتالىقتارى مەن كىتاپحانالارىنا تاعىلىمدامادان وتۋگە جانە وقۋعا جىبەرىلەدى. مەن ءوزىم وڭتۇستىك كورەيادا تاعىلىمدامادان ءوتتىم. ءبىز ستارفيلد، نامسان سياقتى ايگىلى كىتاپحانالارعا، سونداي-اق ۋنيۆەرسيتەت پەن بالالار كىتاپحانالارىنا باردىق. كەلگەننەن كەيىن العان بارلىق ءبىلىمىمىزدى سالىستىرىپ، ءوز اسەرلەرىمىزبەن بولىستىك. شەتەلدە العان يدەيالارىمىز بەن بىلىمدەرىمىزدى اكىمدىك قالالىق كىتاپحانالارعا ەنگىزە باستادى. بۇل كەرەمەت»،- دەدى ول.
ءقازىر قالالىق كىتاپحانالاردا اۆتوماتتاندىرىلعان اقپاراتتىق-كىتاپحانالىق جۇيە ىسكە قوسىلدى، ونى ەنگىزۋ ناتيجەلى مۇمكىندىكتەرگە جول اشتى. ماسەلەن، ەلەكتروندىق وقىرمان بيلەتىن بەرۋ، وقىرمانداردىڭ سۇرانىستارىن وڭدەۋ، قاجەتتى ادەبيەتتەردى ىرىكتەۋ، تاپسىرىس بەرۋ جانە رەزەرۆتەۋ، كىتاپتاردى اۆتوماتتاندىرىلعان رەجيمدە بەرۋ جانە قايتارۋ، كىتاپحانالىق-اقپاراتتىق تەحنولوگيالاردى كەشەندى اۆتوماتتاندىرۋ جۇيەلەرى ىسكە قوسىلدى.