قازاقستاندا 1-سىنىپقا قابىلداۋ ءۇشىن 325 مىڭنان استام ءوتىنىش تۇسكەن، دەپ حابارلايدى almaty-akshamy.kz ق ر بعم باسپا ءسوز قىزمەتىنە سىلتەمە جاساپ.
«بۇگىنگى تاڭدا ءبىرىنشى سىنىپقا قابىلداۋ ءۇشىن 325 مىڭنان استام ءوتىنىش ءتۇستى. اتا-انالارعا ەرتەڭ قۇجات قابىلداۋدىڭ سوڭعى كۇنى ەكەندىگىنە نازار اۋدارۋدى سۇرايمىز. قۇجاتتاردى قابىلداۋ 1 ساۋىردە باستالىپ، 1 تامىزعا دەيىن جالعاساتىنىن ەستەرىڭىزگە سالا كەتەيىك»، - دەلىنگەن ءبىلىم مينيسترلىگىنىڭ حابارلاماسىندا.
بۇل مەرزىم بولاشاق وقۋشىلاردىڭ اتا-انالارى مەكتەپتى الدىن الا انىقتاپ، قاجەت قۇجاتتاردى ۋاقىتىلى تاپسىرىپ، بالالاردى وقۋ قۇرالدارىمەن قامتاماسىز ەتۋى ءۇشىن بەرىلدى. ال مەكتەپ اكىمشىلىگى سىنىپتاردى الدىن الا جيناقتاۋ، وقۋلىقتاردىڭ قاجەتتى كولەمىن ساتىپ الۋ، مۇعالىمدەر اراسىندا ساعاتتاردى ءبولۋ جانە سىنىپتار سانىنا بايلانىستى پەداگوگتەر قۇرامىن انىقتاۋ بويىنشا جۇمىستاردى اتقاراتىن بولادى. وسىعان بايلانىستى مينيسترلىك وتىنىشتەردى ۋاقىتىلى بەرۋدىڭ ماڭىزدىلىعىن ەسكە سالادى.
وتىنىشتەردى قابىلداۋ ەgov.kz ەلەكتروندىق ۇكىمەت پورتالى ارقىلى ەلەكتروندىق فورماتتا جۇرگىزىلەدى. مەكتەپكە قابىلداۋ ءۇشىن كەلەسى قۇجاتتاردى ۇسىنۋ قاجەت: بالانىڭ دەنساۋلىق جاعدايى تۋرالى قۇجاتتار (بالانىڭ دەنساۋلىق پاسپورتى №026/ۋ-3، №063/ۋ نىسانى بويىنشا مەديسينالىق انىقتاما)؛ بالانىڭ كولەمى 3ح4 سم سيفرلىق فوتوسۋرەتى. ءوتىنىش 1 جۇمىس كۇنى ىشىندە قارالادى.
«قىزىل» ايماققا ەنگەن وڭىرلەردە تۇراتىن اتا-انالار مەديسينالىق انىقتامالاردى وقۋ جىلىنىڭ باستالۋىنا دەيىن الا الادى.