قيىن ساتتە قوستانايلىقتارعا قول ءۇشىن سوزعانداردىڭ قاتارىندا «Alataý Aqparat» مەدياحولدينگىنىڭ قىزمەتكەرلەرى دە بار. العاشقىلاردىڭ ءبىرى بولىپ كومەك كورسەتۋگە نيەت بىلدىرگەن ۇجىم مۇشەلەرى ورتتەن زارداپ شەككەندەرگە 280 مىڭعا جۋىق تەڭگەنى قۇراعان ءبىر كۇندىك جالاقىلارىن اۋداردى.
ەستەرىڭىزدە بولسا، 2022 جىلدىڭ 2 قىركۇيەگىندە قوستاناي وبلىسىنىڭ ورماندارىندا ءورت بولىپ، سالدارىنان بىرنەشە ەلدىمەكەن تۇگەلدەي جانىپ كەتكەن ەدى.
ايتىپ كەلمەيتىن اپاتتان زارداپ شەككەن قوستانايلىقتارعا مەملەكەت باسشىسى قاسىم-جومارت توقايەۆ ءوزى بارىپ، ازاماتتاردىڭ قاۋىپسىزدىگىن قامتاماسىز ەتۋگە، سونداي-اق ۇكىمەتكە توتەنشە جاعداي سالدارلارىن جويۋ ءۇشىن قاجەتتى كومەكتىڭ بارلىعىن كورسەتۋگە تاپسىرما بەرگەن بولاتىن. ءاپ-ساتتە الەم نازارىن اۋدارتقان الاپات ءورتتىڭ سالدارى وڭاي بولعان جوق. ءبىراق «كوپ تۇكىرسە – كول» دەگەن. قىزىل جالىنعا ورانعان وڭىرگە ەلىمىزدىڭ ءار ايماعىنان گۋمانيتارلىق، قارجىلاي كومەك كورسەتىپ جاتقان حالقىمىز ءوزىنىڭ بىرلىگىن كورسەتتى. ءتىپتى جەكە كاسىپكەرلەر ەرىكتى تۇردە ءوزىنىڭ جەكە قاراجاتىنا كيىم-كەشەك تە جىبەرىپ جاتتى.
ءتىلسىز جاۋمەن بەتپە-بەت كەلگەن حالىق ءقاۋىپسىز جەرگە كوشىرىلدى. ۇيىنەن ايىرىلعان جانە ۋاقىتشا ەۆاكۋاسيالانعان تۇرعىندارعا ەلىمىزدىڭ ءار ايماعىنان گۋمانيتارلىق كومەك كورسەتىلىپ، ەلىمىزدەگى جەكە كاسىپكەرلەر مەن كومپانيالار اقشا اۋداردى. بىرنەشە مەملەكەتتىك ورگان قىزمەتكەرلەرى ءبىر كۇندىك ەڭبەكاقىسىن بەردى. قارجى جانە ۇلتتىق ەكونوميكا مينيسترلىگىنە ۇكىمەتتىڭ رەزەرۆىنەن ورتتەن كەلتىرىلگەن زالالدى وتەۋگە قاراجات ءبولۋ تۋرالى قاۋلى جوباسىن دايىنداۋ تاپسىرىلدى.
مەملەكەت باسشىسىنىڭ تاپسىرماسى اياسىندا باسپاناسىنان ايىرىلعان ازاماتتار ءۇشىن جاڭا تۇرعىن ۇيلەر سالۋ جۇمىسى شۇعىل باستالىپ، قۇرىلىسشىلار دەرەۋ ىسكە كىرىسكەن بولاتىن. پرەزيدەنتتىڭ جەكە باقىلاۋىندا بولعان بۇل ماسەلە بۇگىندە ءوز ناتيجەسىن بەرىپ، قوستاناي وڭىرىندە ورتتەن زارداپ شەككەندەرگە ارنالعان ۇيلەر بوي كوتەردى. كۇنى كەشە قوستاناي وبلىسىنىڭ اكىمى اۋليەكولدە بوي كوتەرگەن جاڭا ىقشاماۋدانعا ارنايى بارىپ، تاۋلىك بويى ۇزدىكسىز جۇرگىزىلىپ جاتقان قۇرىلىس جۇمىستارىمەن تانىسىپ قايتتى. قازداي تىزىلگەن قىزىل شاتىرلى ۇيلەر قاجەتتى ينفراقۇرىلىممەن تولىقتاي قامتاماسىز ەتىلگەن. قازىرگى تاڭدا بارلىق ۇيگە جىلۋ بەرىلدى.
رەسمي دەرەكتەردەگى مالىمەتتەرگە سۇيەنسەك، تۇرعىن ۇيلەردىڭ جانە ينجەنەرلىك جەلىلەردىڭ جوباسىن «كازقسعزي» اق جانە «مەمساراپتاما» رمك ينستيتۋتتارى ازىرلەگەن. ايتۋلارىنشا، بارلىق ءۇي سۋ، گاز، ەلەكتر ەنەرگياسى، سونداي-اق كىرمە جولدارمەن قامتاماسىز ەتىلگەن. قوستاناي وبلىسى اكىمدىگى بۇگىنگى تاڭدا 13 مەردىگەر ۇيىمنىڭ كۇشىمەن (690 قۇرىلىسشى مەن 11 تەحنيكالىق قاداعالاۋ مامانى جۇمىلدىرىلىپ، 82 تەحنيكا تارتىلدى) تۇرعىن ۇيلەر مەن ينجەنەرلىك جەلىلەردىڭ قۇرىلىس-مونتاجداۋ جۇمىستارى جۇرگىزىپ جاتقاندارىن جەتكىزدى.
ايتا كەتەيىك، قاسىم-جومارت توقايەۆ ءورت سوندىرۋشىلەرمەن كەزدەسۋىندە الاپات الاۋمەن كۇرەسكەن ساربازدارعا العىسىن ايتىپ، ولاردى ناگرادالارعا ۇسىنىپ، قارجىلاي سىيلىقاقىمەن ماراپاتتايتىنىن جەتكىزدى. مەملەكەت باسشىسى ساپار سوڭىندا ەرىكتىلەرمەن دە جولىعىپ، سىن ساعاتتا شەت قالماي، قولۇشىن بەرگەن ازاماتتارعا «سىزدەر ناعىز پاتريوتسىزدار، سىزدەردى ماقتان تۇتامىن» دەپ العىسىن ايتقان بولاتىن.