الەۋمەتتىك جەلىدە وتاندىق جانە شەتەلدىك شىعارمالاردى ناسيحاتتاۋعا باعىتتالعان «بىرگە كىتاپ وقيىق» جوباسى باستالدى. جوبانىڭ شىمىلدىعى ءازىلحان نۇرشايىقوۆتىڭ «ماحاببات قىزىق مول جىلدار» رومانىمەن اشىلدى.
ونى تانىمال بلوگەر-جۋرناليست سانات ءىلياس جانە جاڭابيكە قابىلدا جۇرگىزەدى. ولار وتباسىمەن بىرگە كىتاپ وقىپ، وقىرمانداردى وسى ۇردىسكە قوسىلۋعا شاقىرادى، دەپ حابارلايدى aqshamnews.kz.
ءار ون كۇن سايىن كەلەسى وقىلاتىن كىتاپ جاريالانىپ، كۇن سايىن ونىڭ وقۋ بارىسى مەن تالقىلانۋى YouTube پلاتفورماسىندا، TikTok، Instagram جەلىلەرىندە شىعىپ وتىرادى. سوڭىندا كىتاپ اۆتورىمەن نەمەسە بەلگىلى جازۋشى-پۋبليسيستپەن نە بولماسا كىتاپتاعى كەيىپكەرمەن تاعدىرلاس اداممەن سۇحبات ۇيىمداستىرىلادى.
جوبانىڭ ماقساتى ەلىمىزدىڭ جانە شەتەلدىك جازۋشىلاردىڭ تۋىندىلارىن حالىق اراسىندا كەڭىنەن ناسيحاتتاۋ جانە جاپپاي كىتاپ وقيتىن ۇلتقا اينالدىرۋ. سونداي-اق اتا-انالاردى بالالارىمەن بىرگە كىتاپ وقۋعا شاقىرىپ، وتباسىلىق وقۋ ءداستۇرىن قالىپتاستىرۋ.بالالار مەن جاسوسپىرىمدەردىڭ اراسىنداعى كىتاپ وقۋعا قىزىعۋشىلىقتى باسەكەگە اينالدىرۋ.
جوبانىڭ العاشقى قاتىسۋشىسى ق ر پرەزيدەنتىنىڭ كەڭەسشىسى – پرەزيدەنتتىڭ باسپا ءسوز حاتشىسى بەرىك ءۋالي. ول ءوز سوزىندە قاسىم-جومارت كەمەل ۇلى كىتاپتى كوپ وقيتىنىن جانە مەملەكەت باسشىسىنىڭ جاپپاي كىتاپ وقيتىن ۇلتقا اينالدىرۋ يدەياسىنا ءار ادام ءوز ۇلەسىن قوسۋ كەرەك ەكەندىگىن ايتتى.
بەرىك ءۋالي ۇلى كەلەسى وقىلاتىن تۋىندىعا باۋىرجان مومىش ۇلى اتامىزدىڭ «ۇشقان ۇيا» رومانىن تاڭدادى. ال «بىرگە كىتاپ وقيىق» اماناتىن ودان ءارى جالعاستىرىپ كەلەسى شىعارمانى انىقتاۋدى مادەنيەت جانە اقپارات ءمينيسترى ايدا بالايەۆا حانىمعا ۇسىندى.
جوبا ەرەجەسى:
1.جوباعا قاتىسۋشى الەۋمەتتىك جەلى ارقىلى حالىق اراسىندا ون كۇن بويى تالقىلانعان (وزىنە ۇسىنىلىپ وتىرعان) شىعارمادان ءۇزىندى كەلتىرەدى.
2. ۇناعان كەيىپكەرى تۋرالى ءوز ويىن ايتادى.
3. كەلەسى وقىلاتىن كىتاپتى انىقتايدى.
4. كەلەسى وقىلاتىن كىتاپتىڭ 10 داناسىن جۇرگىزۋشىلەرگە سىيعا تارتادى. (بۇل كىتاپتار سۇراق-جاۋاپ جەڭىمپازدارىنا تارتۋ ەتىلەدى).
5. ول تۋىندىدان كەيىن وقىلاتىن شىعارمانى انىقتاۋ ءۇشىن «بىرگە كىتاپ وقيىق» اماناتىن كەلەسى ادامعا ۇسىنادى.
6. ارىپتەستەرىنە وسى وقىلاتىن كىتاپ جونىندە ءوز پىكىرلەرىن الەۋمەتتىك جەلىدە بىلدىرۋگە كەڭەس بەرەدى.
كىتاپپەن دوس بولعان ادام دۇنيەنىڭ عاجابىن تانىپ بىلە الادى. سوندىقتان ءبىلىمنىڭ كوكجيەگىن تەك كىتاپتان عانا تاباتىنىمىزدى ۇمىتپايىق.#بىرگەكىتاپوقيىق اماناتى جوباسىنان قالىس قالماي، سىزدە ءوز ۇلەسىڭىزدى قوسىڭىز.