پاۆلوداردا «اس بەرۋ مادەنيەتى» قۇجاتى تالقىلاندى
قمدب پاۆلودار وبلىسىنىڭ وكىلدىگىنىڭ ۇيىمداستىرۋىمەن قالا مەشىتىنىڭ يمامدارى، زيالى قاۋىم، اقساقالدار، ارداگەرلەر، جاستار جانە ورتا بۋىن وكىلدەرى، وبلىستىق ءدىن ىستەرى باسقارماسى قىزمەتكەرلەرىنىڭ قاتىسۋىمەن «اس بەرۋ مادەنيەتى» قۇجاتى جونىندە باسقوسۋ جيىنى ءوتتى، دەپ حابارلايدى almaty-akshamy.kz
جيىنعا قاتىسۋشىلار قازالى ۇيدە قازان كوتەرىپ، قوناقاسى بەرۋدىڭ ءتارتىبى تۋرالى كەڭ كولەمدە وي ءبولىستى. بۇگىنگى تاڭدا قازالى ۇيدە قوناقاسى بەرۋ سالتى قاراپايىم ءومىر ادەبى تۇرعىسىنان دا، شاريعي تۇرعىدان دا شەكتەن شىعىپ، ىسىراپشىلىققا جول بەرىلىپ كەلە جاتقانى دا ايتىلدى. بۇل كۇنى تىپتەن مارقۇمنىڭ جانازاسىن شىعارۋ، جەتىسىن، قىرقىن بەرۋدەن دە كوپ شىعىن شىعاتىنى، قازالى ۇيگە رۋحاني تۇرعىدان عانا ەمەس، قارجىلىق تۇرعىدان دا ۇلكەن سالماق تۇسىرەتىنى تۋرالى كوپتەگەن مىسال، دالەلدەر اشىق ايتىلدى.
وسىعان وراي باسقوسۋعا قاتىسقان القالى توپتىڭ اتىنان وبلىس حالقىنا ارنايى ۇندەۋ قابىلداۋعا كەلىستى. جيىندا ۇندەۋدىڭ جوباسى وقىلىپ، ونى ۋاقىت ۇتتىرماي كوپتىڭ تالقىسىنا سالىپ، ۇسىنىستار قابىلداۋعا شەشىم شىعاردى.
«بۇل ۇندەۋ ارقىلى الداعى ۋاقىتتا مارقۇمنىڭ ۇيىندە قوناقاسىن بەرۋ ءراسىمىن ءبىر قالىپقا تۇسىرەتىن، ىسىراپتى بارىنشا تەجەيتىن، ءبىر جۇيەگە كەلتىرەتىن ارنايى قۇجات قابىلدانادى» دەيدى وبلىستىڭ باس يمامى جولداس قوسپاق ۇلى.