ايسۇلتان سەيىتوۆتىڭ «قاش»، دارحان تولەگەنوۆتىڭ «اعايىندى» جانە اسحات كۋچينچيرەكوۆتىڭ «باۋىرىنا سالۋ» كارتينالارى «ازيالىق وسكار» دەپ اتالاتىن بەدەلدى Asia Pacific Screen Awards سىيلىعىنا ۇمىتكەرلەر قاتارىنا كىردى.
ايسۇلتان سەيىتوۆتىڭ كارتيناسى بىردەن ەكى نوميناسيادا ۇسىنىلعان – «ۇزدىك فيلم» جانە «ۇزدىك وپەراتورلىق جۇمىس». باستى نوميناسيادا ول جاپونيادان، قىتايدان جانە گرۋزيادان كەلگەن كارتينالارمەن تالاسقا تۇسەدى، ولاردىڭ اراسىندا بيىلعى ۆەنەسيا كينوفەستيۆالىندە قازىلار القاسىنىڭ ارنايى جۇلدەسىنىڭ يەگەرى اتانعان ريۋسۋكە حاماگۋتيدىڭ «زۇلىمدىق جوق» اتتى تۋىندىسى دا بار، دەپ حابارلايدى اlmaty-akshamy.kz.
ال دارحان تولەگەنوۆ پەن اسحات كۋچينچيرەكوۆ «ۇزدىك رەجيسسەر» جانە «ۇزدىك جاستار ءفيلمى» نوميناسيالارىنا ىلىكتى. اسىرەسە تولەگەنوۆتىڭ نوميناسياسىندا ەرەكشە تارتىس بولايىن دەپ تۇر، سەبەبى وندا جوعارىدا ايتىلعان حاماگۋتي مەن 2023 جىلعى «ساندەنس» جانە بەرلين كينوفەستيۆالدەرىنىڭ قاتىسۋشىسى سەلين سون بار.
وتاندىق ءۇش كارتينا دا رەجيسسەرلەردىڭ دەبيۋتتىك جۇمىستارى بولىپ تابىلادى، ال ولاردىڭ ەكەۋى – «اعايىندى» جانە «باۋىرىنا سالۋ» ۇلتتىق كينونى قولداۋ مەملەكەتتىك ورتالىعىنىڭ كومەگىمەن تۇسىرىلگەن.
«قاش» ءفيلمى قازاق دالاسىنداعى 30-شى جىلدارداعى اشارشىلىق كەزىندەگى حالىقتىڭ قيىن تاعدىرى تۋرالى باياندايدى. ءقابىر قازۋشى يساتاي ءوز اۋىلىن قۇتقارۋ ءۇشىن ءقاۋىپتى ميسسياعا بارادى، ءبىراق جولدا وعان كەزبە ادام كەزدەسىپ، ونى اداستىرادى. ايتا كەتسەك، ايسۇلتان سەيىتوۆ جازدا شانحاي حالىقارالىق كينوفەستيۆالىندە وسى جۇمىسى ءۇشىن «ۇزدىك رەجيسسەر» نوميناسياسىن جەڭىپ الدى.
«اعايىندى» ءفيلمىن ماكسيم اكباروۆتىڭ Golden Man Media كومپانياسى شىعارعان. وتكەن جىلدىڭ قىركۇيەگىندە فيلم گەرمانياداعى Oldenburg International Film Festival فەستيۆالىندە "كينو رۋحى" سىيلىعىن جەڭىپ العان بولاتىن، ال وسى جىلدىڭ ءساۋىر ايىندا قازاقستاننىڭ كينوسىنشىلار قاۋىمداستىعى بۇل كارتينانى 2022 جىلدىڭ "ۇزدىك دراماسى" دەپ تانىدى. سونىمەن قاتار، "اعايىندى" – يتاليا، رەسەي، وزبەكستان، جۇڭگو، يسپانيا جانە بولگارياداعى حالىقارالىق كينوفەستيۆالدەردە 10 ماراپاتقا يە بولدى.
«باۋىرىنا سالۋ» ءفيلمى ءسابي كەزىنەن اجەسىنىڭ تاربيەسىندە بولعان بالانىڭ وقيعاسىن باياندايدى. تۋىندىنىڭ تۇساۋى جاقىندا عانا يسپانيانىڭ سان-سەباستيان قالاسىندا وتكەن بەدەلدى كينوفەستيۆالدە كەسىلدى، وندا ول «جاڭا رەجيسسەرلەر» باعدارلاماسىندا كورسەتىلدى.
وسى جىلى 16 رەت وتكىزىلەتىن بەدەلدى حالىقارالىق Asia Pacific Screen Awards سىيلىعىنىڭ جەڭىمپازدارى 3 قاراشادا اۆستراليادا جاريالانادى. وتكەن جىلداردىڭ جەڭىمپازدارىنىڭ قاتارىندا بەلگىلى قازاقستاندىق رەجيسسەر ءادىلحان ەرجانوۆ بار. APSA كينوسىيلىعىن يۋنەسكو، حالىقارالىق كينوپروديۋسەرلەر قاۋىمداستىعىنىڭ فەدەراسياسى جانە بريسبەن قالالىق كەڭەسى ۇيىمداستىرادى.