زەينەتاقى جيناعىن العانداردىڭ اراسىندا الماتىلىقتار كوپ.
2021 جىلدىڭ قاڭتارىنان وسى ۋاقىتقا دەيىن 1 ميلليوننان استام قازاقستاندىق زەينەتاقى جيناقتارىنا باسپانا الدى، ەمدەلۋگە جۇمساپ، وزگە قارجى ينستيتۋتتارىنا سەنىمگەرلىك باسقارۋعا بەردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ءبىرىڭعاي جيناقتاۋشى زەينەتاقى قورىنىڭ مالىمەتىنشە، 2021 جىلدىڭ قاڭتارى مەن وسى جىلدىڭ 1 ناۋرىزى ارالىعىندا 967 853 قازاقستاندىق زەينەتاقى جيناعىنىڭ شەكتى مولشەردەن اساتىن سوماسىن ءۇي جاعدايىن جاقسارتۋعا الۋ ءۇشىن ءوتىنىم بەردى. ولارعا قوردان 2،7 ترلن تەڭگە قارجى اۋدارىلدى. بۇل رەتتە ءبىرجولعى زەينەتاقى تولەمدەرىنىڭ ورتاشا سوماسى 3،1 ملن تەڭگە بولدى. زەينەتاقى جيناعىن العانداردىڭ باسىم كوپشىلىگى الماتى، نۇر-سۇلتان قالالارىنىڭ جانە ماڭعىستاۋ وبلىسىنىڭ تۇرعىندارى.
ايتا كەتەرلىگى، ۋاكىلەتتى وپەراتورلاردان سالىمشىلاردىڭ (الۋشىلاردىڭ) جەكە زەينەتاقى شوتتارىنا ءوتىنىش بەرۋشىنىڭ ءوتىنىشى جانە وزگە دە سەبەپتەرمەن 379،9 ملرد تەڭگەدەن اسا قاراجات قايتارىلدى. سەبەبى، قازاقستاندىقتار ءبىرجولعى زەينەتاقى تولەمدەرىن بەلگىلەنگەن مەرزىمدە پايدالانباعان.
سونىمەن قاتار 198 657 ازامات زەينەتاقى جيناقتارىن ەمدەلۋگە پايدالانۋ ءۇشىن ءوتىنىم بەردى. جالپى سوما 176،4 ملرد تەڭگەنى قۇرايدى. بۇل رەتتە الۋعا بولاتىن ورتاشا سوما – شامامەن 0،9 ملن تەڭگە. ءبىراق، ءوتىنىش بەرۋشىنىڭ ءوتىنىشى نەمەسە وزگە دە سەبەپتەرمەن بەلگىلەنگەن مەرزىمدە پايدالانىلماعان 19،9 ملرد تەڭگە سالىمشىلاردىڭ شوتتارىنا قايتارىلدى.
بجزق زەينەتاقى اكتيۆتەرىن سەنىمگەرلىكپەن باسقارۋعا قاتىستى ءتورت ينۆەستيسيالىق پورتفەلدى باسقارۋشىمەن شارت جاساسقان. وسىلايشا سالىمشىلاردىڭ 7،6 ملرد تەڭگەسىنىڭ 45،86% نەمەسە 3،46 ملرد تەڭگەسى «Jusan Invest» اق-قا، 27،65% نەمەسە 2،09 ملرد تەڭگەسى «Halyk Global Markets» اق-قا، 15،97% نەمەسە 1،21 ملرد تەڭگەسى «BCC Invest» اق-قا، 10،53% نەمەسە 0،80 ملرد تەڭگەسى «سەنتراس سەكيۋريتيز» اق-قا اۋدارىلدى.