باس ءمۇفتي ناۋرىزباي قاجىنىڭ يگى باستاماسىنا مەشىت يمامدارى مەن جاماعاتى ءۇن قوستى.
قازاقستانداعى وڭىرلەردە سۋ تاسقىنى بولىپ جاتقانىنا بايلانىستى ەلىمىزدىڭ بارلىق يمامى ءبىر مەزەتتە دۇعا وقىدى، دەپ حابارلايدى Almaty-akshamy.kz
قمدب باسپا ءسوز قىزمەتىنىڭ مالىمەتىنشە، باس ءمۇفتي ناۋرىزباي قاجى تاعان ۇلىنىڭ «ءبىر مەزەتتە ءبىر دۇعا» يگى باستاماسىنا ەلىمىزدىڭ بارلىق وڭىرىندە مەشىت يمامدارى مەن جاماعاتى ءۇن قوسىپ، سۋ تاسقىنىنا بايلانىستى قۇران وقىپ، دۇعا جاسادى.
«اتاپ ايتقاندا، جاماعاتپەن ءبىر مەزەتتە دۇعا جاساۋ استانا، الماتى مەن شىمكەنت قالالارى، سونداي-اق وبلىس ورتالىقتارى مەن اۋداندارىندا قۇپتان نامازى الدىندا ۇيىمداستىرىلدى. يمامدار جاماعاتپەن بىرگە سۋ تاسقىنىنان زارداپ شەككەندەرگە جەڭىلدىك تىلەپ، اللا تاعالادان ەلدىڭ اماندىعى مەن تىنىشتىعىن سۇراپ دۇعا تىلەدى»، دەلىنگەن قازاقستان مۇسىلماندارى ءدىني باسقارماسىنىڭ حابارلاماسىندا.