وتكەن جىلدىڭ جەلتوقسان ايىنىڭ قورىتىندىسىنا سايكەس، بالعىن كوكونىس باعاسى ءبىر جىلدا 19،2%-عا قىمباتتادى.
ەڭ جوعارى باعا ءوسىمى الماتى وبلىسىندا تىركەلدى. انتيليدەرلەر ۇشتىگىندە تۇركىستان جانە ۇلىتاۋ وبلىستارى بار. باعا ءبىر جىلدا ەڭ از قىمباتتاعان ءوڭىر – باتىس قازاقستان وبلىسى، دەپ حابارلايدى Almaty-akshamy.kz Elorda.info سايتىنا سىلتەمە جاساپ.
رەسپۋبليكادا 20 ءوڭىردىڭ ىشىندە جاڭا پىسكەن كوكونىس باعاسى پاۆلودار وبلىسىندا عانا تومەندەدى.
قيار، پياز، قىزاناق، كارتوپ، قىزىلشانىڭ باعاسى كۇرت ءوستى. ءسابىز بەن اق قىرىققابات باعاسى ارزاندادى.
2022 جىلعى قاڭتار-قازان ايلارىنىڭ قورىتىندىسى بويىنشا بۇرىش، قيار مەن كورنيشون، سارىمساق، باقشا داقىلدارىن، قىرىققابات جانە قىزاناقتىڭ يمپورتى وسكەنى بايقالدى.
بۇل رەتتە كارتوپ، پياز، اسحانالىق ءسابىز، باكلاجان جانە اسحانالىق قىزىلشا يمپورتى تومەندەگەن.
كوكونىس ەكسپورتىنا كەلەر بولساق، ەلىمىزدەن سىرتقى نارىقتارعا بۇرىش، اسحانالىق قىزىلشا ، باقشا داقىلدارى، ءسابىز ، پياز جانە سارىمساقتىڭ جەتكىزىلىمى ارتتى.
قىرىققابات، قيار جانە كورنيشون، قىزاناق، باكلاجان ەكسپورتى قىسقاردى.