"داۋىلپاز" دارىگەر - بالالار ءومىرىنىڭ اراشاشىسى.
ءبىر جىلدا 3 جاسقا دەيىنگى بۇلدىرشىندەردىڭ اعزاسىنان 80-نەن استام ينە، ويىنشىق، تيىن سەكىلدى بوگدە زاتتار شىققان.
بۇل تۋرالى «بالالارعا جەدەل مەديسينالىق كومەك كورسەتۋ ورتالىعىنىڭ» دارىگەرلەرى ءمالىم ەتتى، دەپ حابارلايدى Almaty-akshamy.kz Almaty.tv-عا سىلتەمە جاساپ.
ولاردىڭ ايتۋىنشا، ومىرىنە ءقاۋىپ تونگەن بالالاردى كوبىنە مۇرات ەسىمدى حيرۋرگ ەمدەيدى. سەبەبى ونىڭ بىلىكتىلىگىنە، ارىپتەستەرىنىڭ ايتۋىنشا، تەڭ كەلەر مامان جوق. ەكى جاستاعى ءبۇلدىرشىننىڭ اناسى ءاليمان سول كۇندى قورقىنىشپەن ەسكە الادى. ءبۇلدىرشىن ويناپ وتىرىپ، تيىن جۇتىپ قويعان. سودان تەمىر زات تىنىس الۋ مۇشەسىنە تۇرىپ قالىپ، بالا تۇنشىعا باستاعان.
«قورقىپ، "جەدەل جاردەم" شاقىردىق. سودان وسى قالالىق جەدەل جاردەم اۋرۋحاناسىنا الىپ كەلدى»، – دەدى قالا تۇرعىنى ءاليمان ءامىروۆا.
سول ساتتە اۋرۋحاناعا حيرۋرگ مۇرات دۇيسەبايەۆ تا شۇعىل جەتەدى. سودان بۇل بالانى ءوزى قابىلداپ، امان الىپ قالادى. "داۋىلپاز" دارىگەر 5 جىل ىشىندە جۇزدەگەن وتا جاساپ، قولىندا ادام ولمەگەن. ونىڭ بىلىكتىلىگىنە ارىپتەستەرى دە ءتانتى.
«مۇرات تالعاتۇلىن بالالارعا كومەك كورسەتۋ ءۇشىن اۋرۋحانامىزعا شاقىرتامىز. كەيدە كۇنىنە 2 رەت، ءتىپتى، كۇن سايىن شاقىرامىز»، – دەدى «بالالار شۇعىل مەديسينالىق جاردەم ورتالىعى» مكك ءبولىم مەڭگەرۋشىسى مەيىرجان قۇرمانالييەۆ.
مۇراتتىڭ ايتۋىنشى، بالا ىشىنەن تيىن الىپ شىعۋ قالىپتى جاعدايعا اينالعان. الايدا ءبۇلدىرشىن ماگنيت نەمەسە سىركە سۋىن جۇتسا، ءومىرىن ساقتاپ قالۋ قيىنعا تۇسەدى ەكەن.
«جامان نارسە بولدى. ءقازىر وڭەشتىڭ كۇيۋىمەن اۋرۋحاناعا كوپ ءتۇسىپ جاتادى. وڭەش كۇيسە، تىرتىق قالىپ، جابىسىپ، وتا جاساۋعا دەيىن بارادى»، – دەدى بالالار حيرۋرگى مۇرات دۇيسەبايەۆ.
تالاي جاندى امان الىپ قالعان حيرۋرگ اتا-انالاردىڭ دا بالاسىنا بەيجاي قاراماۋىن سۇرايدى. ول مايدا-شۇيدەنىڭ ءوزى تالايدىڭ تاعدىرىن تالقانداپ، بالاعا زار قىلعانىن ايتتى.