"اۋرۋ - استان" دەگەن ءسوز بەكەر ايتىلماعان. كۇنىنە ءبىر بانكا ءتاتتى سۋسىن، اراسىندا فاستفۋد، ءتاتتى مەن چيپستەر – بۇگىندە جاستاردىڭ اس مازىرىندە ءجيى كورىنىس تاباتىن تاعام تۇرلەرى. الايدا جەسەڭ ايىزىڭ قاناتىن تارتىمدى تاعامدار مەن سۋسىنداردىڭ قۇرامىندا نە جاسىرىنىپ جاتىر؟ وسى تۋراسىندا اqshamnews.kz ءتىلشىسى ديەتولوگ، نۋتريسيولوگ جاننا نۇربەرگەنقىزىمەن سۇحبات قۇرىپ، دۇرىس تاماقتانۋدىڭ قاراپايىم، ءبىراق ناتيجەلى جولدارى جايلى اڭگىمە قۇردى.
جاننا نۇربەرگەن قىزى
ديەتولوگ
"تابيعي" دەپ جازىلعان سۋسىننىڭ ءبارى پايدالى ەمەس"
ديەتولوگ، نۋتريسيولوگ جاننا نۇربەرگەن قىزىنىڭ ايتۋىنشا، دۇكەن سورەلەرىندە تۇرعان ءتاتتى سۋسىنداردىڭ باسىم بولىگىندە قانت مولشەرى شەكتەن تىس كوپ. كوپ جاعدايدا سىرتىندا «تابيعي» دەپ جازىلعان ونىمدەردىڭ ءوزى ادام اعزاسىنا ءقاۋىپتى بولۋى مۇمكىن.
«مىسالى، 0،5 ليتر قۇرامىندا 120 گرامم قانت بار. بۇل – ءبىر كەسەگە جۋىق تازا قانت. ەندى ەلەستەتىڭىز، جاستار مۇنداي سۋسىنداردى كۇنىنە ءبىر ەمەس، بىرنەشە مارتە ءىشىپ ءجۇر. ونىڭ ۇستىنە بۇل سۋسىنداردا ءتۇرلى بوياعىشتار، حوش يىستەندىرگىشتەر مەن حيميالىق كونسەرۆانتتار بولادى. بۇل قوسپالار اعزاعا كەرى اسەر ەتەدى»، – دەيدى مامان.
ءتىپتى كەيبىر جەڭىل شاي تۇرلەرىنە دە حوش يىستەندىرگىشتەر قوسىلادى. ديەتولوگ مۇنداي سۋسىنداردى «زيانسىز» دەپ ءىشۋ — ۇلكەن قاتەلىك ەكەنىن ايتادى.
سۋرەت: جي الىندى
زياندى قوسپالار اعزادا 3 ايعا دەيىن ساقتالادى
ماماننىڭ ايتۋىنشا، ءتاتتى سۋسىندارمەن بىرگە اعزاعا ەنەتىن زياندى زاتتار بىردەن سىرتقا شىقپايدى. ولار اعزادا جينالىپ، توكسينگە اينالادى.
«اعزاعا تۇسكەن زياندى زاتتار بۇيرەك ارقىلى سۇيىقتىقپەن بىرگە سىرتقا شىعارىلادى. الايدا ولاردىڭ كەيبىرى 2–3 اي بويى اعزادا قالىپ قويادى. بۇل — جاسۋشالار دەڭگەيىندە بۇزىلۋعا، زات الماسۋدىڭ ناشارلاۋىنا، سوزىلمالى اۋرۋلارعا سەبەپ بولۋى مۇمكىن»، – دەيدى ديەتولوگ.
فاستفۋدقا كەلسەك، مامان ونى بارىنشا شەكتەۋ كەرەك دەيدى. ەڭ دۇرىسى — 3 ايدا ءبىر رەت قانا تۇتىنۋ كەرەك دەيدى.
ءتاتتىقۇمارلىقتان قالاي ارىلۋعا بولادى؟
ادامنىڭ تاتتىگە قۇمار بولۋى كەيدە پسيحولوگيالىق جاعدايىمەن دە بايلانىستى ەكەنىن جاننا نۇربەرگەن قىزى اتاپ ءوتتى.
«ءتاتتى جەگەن ساتتە اعزادا بىردەن ەنەرگيا بولىنەدى، كوڭىل-كۇي جاقسارىپ، ميعا “ءبارى جاقسى” دەگەن سيگنال بارادى. وسىلايشا ادام قايتا-قايتا سول كۇيدى سەزىنگىسى كەلىپ، تاتتىگە تاۋەلدى بولا باستايدى»، – دەيدى ول.
ماماننىڭ ايتۋىنشا، تاتتىگە قۇمار ادامداردا كەيدە ىشەك پارازيتتەرى بولۋى مۇمكىن. سوندىقتان الدىمەن سەبەپتى انىقتاپ، كەيىن بالاما، پايدالى تاعامدارعا كوشۋ ماڭىزدى.
زياندىنى – پايدالىعا قالاي الماستىرۋعا بولادى؟
ديەتولوگ دۇرىس تاماقتانۋ قىمبات ەمەس ەكەنىن باسا ايتتى. بار بولعانى — ساپالى ءارى قاراپايىم ونىمدەردى دۇرىس پايدالانۋ كەرەك.
«قارا سۋ – تەگىن. قارا ۇن – اق ۇننان ارزان. اۆوكادو مەن چيا بولماسا دا، قىرىققابات، ءسابىز، بروككولي سەكىلدى كوكونىستەر بار. قانت ورنىنا بال، ستيەۆيا نەمەسە ەريتريت قوسىڭىز. ءتاتتى ورنىنا قۇرعاق جەمىستەر جەپ، فاستفۋد ورنىنا ۇيدە سەندۆيچ جاساڭىز»، – دەپ كەڭەس بەرەدى جاننا نۇربەرگەن قىزى.
شۇجىق ورنىنا — ەتتەن پىسىرىلگەن سورپا، مايونەزدىڭ ورنىنا — قايماق، ال ءتاتتى يوگۋرتتىڭ ورنىنا — ءۇي ايرانىن پايدالانۋ كەرەك. ديەتولوگتىڭ ايتۋىنشا، ەڭ باستىسى — تاعام ساۋاتتىلىعى. ادام ءونىمدى ساتىپ الاردا قۇرامىن وقىپ، تاڭداۋ جاساۋعا داعدىلانۋى كەرەك.
«فيتنەسكە ارنالعان تاعامداردىڭ ءوزى زيانسىز ەمەس. سوندىقتان كوزىمىزدى اشىپ، نە ءىشىپ، نە جەپ جۇرگەنىمىزدى ءتۇسىنۋىمىز كەرەك. تاڭداۋ وزىمىزدە. تاعام تاڭداعاندا دا ساۋاتتى بولايىق!»، – دەيدى مامان.