ءبىر ايعا سوزىلعان ەكسپەديسيا اياقتالدى

«اتامەكەن» ەكسپەديسياسى مارەسىنە جەتتى

 ءبىر ايعا سوزىلعان جوبا – ەل تاۋەلسىزدىگىنىڭ 30 جىلدىعىنا تارتۋ رەتىندە ۇيىمداستىرىلدى. ەلوردادان شىققان ءبىرىنشى توپ باتىس قازاقستان ارقىلى ءجۇرىپ، وڭتۇستىك وڭىرلەردى ارالاپ الماتىعا جەتتى. ال ەكسپەديسيانىڭ ەكىنشى توبىنىڭ باعىتى شىعىس قازاقستان ارقىلى ءوتتى. ەكسپەديسيا مۇشەلەرى ءار ءوڭىردىڭ ءتولقۇجاتى سانالاتىن تاريحي ورىنداردا، تۋريستىك نىسانداردا بولىپ جان-جاقتى كورسەتتى. ساپار الماتىنىڭ شىمبۇلاق، كوكتوبە جانە ساق قورعاندارى سىندى تۋريستىك جەرلەرىمەن قورىتىندىلانعان، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.

اتالعان ەكسپەديسيانى «ەگەمەن قازاقستان» مەن «كازاحستانسكايا پراۆدا» رەسپۋبليكالىق گازەتتەرىنىڭ قىزمەتكەرلەرى ۇيىمداستىرعان. ەكسپەديسيا بارىسىنان تىلشىلەر ەلىمىزدىڭ كورىكتى جەرلەرى تۋرالى 15 ماقالا جاريالادى.

«تاۋەلسىزدىككە وراي سول جىلدارى جەتكەن جەتىستىكتەرىمىزدى، ەل وڭىرلەرىنىڭ كەشەگى مەن بۇگىنگى دەڭگەيىن كورسەتۋ نەگىزگى ماقساتىمىز بولدى. قورىتىندى جيىندى ادەيى وسى تاۋەلسىزدىگىمىزدىڭ، ازاتتىعىمىزدىڭ التىن بەسىگى الماتىدا تۇيىندەپ وتىرمىز»، - دەيدى «ەگەمەن قازاقستان» رەسپۋبليكالىق گازەتى» اق باسقارما ءتوراعاسىنىڭ ورىنباسارى ايبىن شاعالاق.