ءبىر ادامنىڭ بىرنەشە بانكتەن نەسيە الۋ مۇمكىندىگى بولمايدى

بۇل تۋرالى ءماجىلىس دەپۋتاتى دانيا ەسپايەۆا ءمالىم ەتتى.

اتاپ ايتقاندا، بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبiر زاڭنامالىق اكتiلەرiنە ساقتاندىرۋ نارىعىن جانە باعالى قاعازدار نارىعىن رەتتەۋ مەن دامىتۋ ماسەلەلەرى بويىنشا وزگەرiستەر مەن تولىقتىرۋلار ەنگiزۋ تۋرالى» زاڭ جوباسى ماقۇلداندى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

وسى ورايدا ينتەرنەت-الاياقتىققا بايلانىستى تاۋەكەلدەردى تومەندەتۋ جانە قارىز الۋشىلاردىڭ بورىشتىق جۇكتەمەسىنىڭ دەڭگەيىن باقىلاۋ ماقساتىندا كرەديتتىك بيۋرولارعا اقپاراتتى ۇسىنۋ مەرزىمدەرىن قارىزعا بايلانىستى بازالىق مالىمەتتەر بويىنشا 15 جۇمىس كۇنىنەن 1 جۇمىس كۇنىنە دەيىن قىسقارتۋ كوزدەلگەن.

«قازىرگى كەزدە نەسيە الۋ سالاسىندا الاياقتىق جاعدايلارى كوپ كەزدەسەدى. نەگە وسىنداي فاكتىلەر كەزدەسەدى؟ ءاربىر قارجىلىق ۇيىم نەمەسە ەكىنشى دەڭگەيدەگى بانكتەر بەرىلگەن نەسيەلەر تۋرالى كرەديتتىك بيۋروعا جولدايدى، وندا بەرىلگەن نەسيەلەردىڭ بازاسى 15 كۇننىڭ ىشىندە قالىپتاسادى. ءبىزدىڭ تۇزەتۋلەرگە سايكەس، نەسيە بەرۋ اقپاراتتارى ءبىر كۇننىڭ ىشىندە تىركەلەدى. ەندى بىر-ەكى كۇننىڭ ىشىندە 5-6 بانكتە ءبىر مەزگىلدە نەسيە الۋعا تىرىسقان ادامداردا مۇنداي مۇمكىندىك بولمايدى. سەبەبى كرەديتتىك بيۋرودا بۇل ادامنىڭ ءبىر بانكتە نەسيە العانى تۋرالى مالىمەت تىركەلىپ تۇرادى. سايكەسىنشە، ونىڭ قارىز جۇكتەمەسى ەسەپتەلەدى»، - د.ەسپايەۆا.

وسى ورايدا دەپۋتات نەسيە العان ادامنىڭ قارىز جۇكتەمەسىن ەسكەرە وتىرىپ، باسقا بانك كرەديتتىك بيۋرو بازاسى ارقىلى بۇل مالىمەتتەردى كورىپ تۇراتىنىن ايتتى.

«ەكىنشى بانك قايتادان نەسيە الۋعا كەلگەن ادامنىڭ مۇمكىندىگىن قاراپ، ونىڭ تابىسى نەسيەنى وتەۋگە جەتپەيتىنىن كورىپ، ونىڭ ءوتىنىشىن ماقۇلدامايدى. سونىمەن قاتار، بۇل قادامدار ينتەرنەت-الاياقتىققا دا توسقاۋىل قويادى»، - دەدى دانيا ەسپايەۆا.