7-14 شىلدە ارالىعىندا استانا قالاسىندا بيولوگيادان IBO-2024 35ء-شى حالىقارالىق وليمپياداسى وتەدى.
بۇل تۋرالى ق ر پرەزيدەنتى جانىنداعى ورتالىق كوممۋنيكاسيالار قىزمەتىندە وتكەن بريفينگتە ورتا ءبىلىم كوميتەتىنىڭ ءتوراعاسى قانىبەك جۇماشيەۆ ايتتى، دەپ حابارلايدى Almaty-akshamy.kz وقۋ-اعارتۋ مينيسترلىگىنە سىلتەمە جاساپ.
حالىقارالىق بيولوگيا وليمپياداسى (IBO) – الەم ەلدەرىنىڭ ورتا مەكتەپ وقۋشىلارى اراسىنداعى ەڭ ءباسى جوعارى باسەكە جانە ءبىلىم سالاسىنداعى ەڭ اۋقىمدى شارالاردىڭ ءبىرى. قازاقستاندىق مەكتەپ وقۋشىلارى عىلىمي جارىسقا 1996 جىلدان بەرى قاتىسىپ كەلەدى. وسى ۋاقىت ىشىندە ولار 2 التىن، 20 كۇمىس، 54 قولا مەدال جانە 14 قۇرمەت گراموتاسىن جەڭىپ الدى. بۇل جوعارى كورسەتكىش بولىپ سانالادى. قازاقستاننىڭ مۇنداي بەدەلدى ءىس-شارانى وتكىزۋ ورنى رەتىندە تاڭدالۋى دا سوندىقتان.
بيىلعى وليمپياداعا 80 ەلدەن 350 وقۋشى قاتىسادى دەپ كۇتىلۋدە. دودادا 40-تان استام جۇلدە تالاسقا سالىنادى. ەلىمىزدىڭ قۇراما كومانداسى ساپىندا ءتورت وقۋشى بار.
«وقۋ جىلىنىڭ باسىنان باستاپ وليمپيادا تاپسىرمالارىن حالىقارالىق دەڭگەيدە ازىرلەۋ بويىنشا ايتارلىقتاي جۇمىستار اتقارىلدى. تاپسىرمالار بيوحيميا، مولەكۋلالىق بيولوگيا، بيوينفورماتيكا، اناتوميا جانە جانۋارلار فيزيولوگياسى سالاسىن قامتيدى. بۇگىنگى تاڭدا بيولوگيادان قازاقستاننىڭ وليمپيادالىق قۇراماسى الداعى جارىستارعا قىزۋ دايىندالىپ جاتىر، «دارىن» ورتالىعىندا وقۋ-جاتتىعۋ جيىندارى وتۋدە. وليمپيادا اياسىندا قازاقستاندىق پەداگوگتەر ءۇشىن بيولوگيادان وليمپيادا ەسەپتەرىن شەشۋ بويىنشا شەبەرلىك ساباقتارى، سەمينارلار جانە الەمنىڭ جەتەكشى عالىمدارىنىڭ عىلىمي-تاجىريبەلىك كونفەرەنسيالارى وتەدى»، - دەپ اتاپ ءوتتى كوميتەت ءتوراعاسى.
ەسكە سالايىق، وتكەن جىلدىڭ قاراشا ايىندا قازاقستان رەسپۋبليكاسىنىڭ وقۋ-اعارتۋ ءمينيسترى عاني بەيسەمبايەۆ پەن IBO حالىقارالىق ۇيىمداستىرۋ كوميتەتىنىڭ ءتورايىمى لەنكا ليبۋسوۆانىڭ كەزدەسۋى وتكەن بولاتىن. تاراپتار زياتكەرلىك سايىستى ۇيىمداستىرۋ ماسەلەلەرىن، سونداي-اق قازاقستاندىق ءبىلىم بەرۋدى دامىتۋ پەرسپەكتيۆالارىن تالقىلادى.
جالپى، 2023 جىلدىڭ قورىتىندىسى بويىنشا قازاقستاندىق وقۋشىلار حالىقارالىق وليمپيادالاردا 580 مەدالعا يە بولدى، ونىڭ ىشىندە 23 مەدالدى ەڭ بەدەلدى جەتى الەمدىك وليمپيادادا جەڭىپ العان: IMO، IPhO، IBO، IOL، IسhO، IGeO، IOI. ولارعا ءبىرجولعى اقشالاي سىيلىق بەرىلدى: التىن مەدال العاندارعا – 1500 اەك، كۇمىس ءۇشىن – 1000 اەك، قولا ءۇشىن – 500 اەك، سونداي-اق ولاردى دايىنداعان پەداگوگتەرگە بازالىق جالاقىنىڭ 8،5-تەن 26،5 ەسەلەنگەن مولشەرىندە سىياقى تولەندى.