ول پاندەميانىڭ الدىن الۋ ءۇشىن ينۆەستيسيانى كوبەيتۋگە شاقىردى
Microsoft نەگىزىن قالاۋشى، كاسىپكەر جانە فيلانتروپ بيلل گەيتس كوروناۆيرۋستىڭ «ەڭ جامان» شتامى ءالى دە شىعۋى مۇمكىن ەكەنىن ايتتى، دەپ حابارلايدى Almaty-akshamy.kz Baq.kz-كە سىلتەمە جاساپ.
Financial Times گازەتىنە بەرگەن سۇحباتىندا بيلل گەيتس دۇنيە ءجۇزى COVID-19-دىڭ وتە جۇقپالى جانە ولىمگە اكەلەتىن نۇسقاسىنا تاپ بولۋ ءقاۋپى ءالى دە بار ەكەنىن مالىمدەدى.
«بۇل ەكىتالاي. ونىڭ ورىندالۋى بەس پايىزدان عانا اسادى. مەن جامان بولجام جاساعىم كەلمەيدى، ءبىراق پاندەميا كەزىندە ءبىز ونىڭ ەڭ جامان كورىنىسىن ءالى كورمەگەن بولۋىمىز مۇمكىن»، – دەدى ول.
گەيتستىڭ پىكىرىنشە، حالىقارالىق توپ قۇرۋ قاجەت، ونىڭ مىندەتى جاھاندىق دەنساۋلىققا تونەتىن قاتەرلەردى جىلدام انىقتاۋ جانە وسى سالادا مەملەكەتتەر اراسىنداعى قارىم-قاتىناستى جاقسارتۋ بولادى.
ول ەل باسشىلارىن دەنساۋلىق داعدارىسىن «نازاردا ۇستاۋعا» جانە بولاشاقتا پاندەميانىڭ الدىن الۋ ءۇشىن ينۆەستيسيانى كوبەيتۋگە شاقىردى.