الماتىدا فرانسۋز ءتىلى وقىتۋدىڭ وزەكتى ماسەلەلەرى تالقىلاندى: حالىقارالىق سەرىكتەستىك پەن يننوۆاسيالىق ادىستەر نازاردا
قازاقستان مەن فرانسيا اراسىنداعى ستراتەگيالىق ارىپتەستىكتى دامىتۋ ماقساتىندا الماتى قالاسى بوستاندىق اۋدانىنىڭ №22 مەكتەپ-گيمنازياسىندا «فرانسۋز ءتىلىن وقىتۋدىڭ زاماناۋي ماسەلەلەرى، تاجىريبە الماسۋ» اتتى اۋقىمدى سەمينار ءوتتى. بۇل شارا ەكى ەل اراسىنداعى ءبىلىم بەرۋ سالاسىنداعى جول كارتاسىن جۇزەگە اسىرۋ اياسىندا ۇيىمداستىرىلدى. بۇل تۋرالى Aqshamnews.kz سايتى حابارلايدى.
سەمينار اياسىندا الماتى مەكتەپتەرىندە فرانسۋز ءتىلىن وقىتۋداعى وزەكتى ماسەلەلەر مەن ولاردى شەشۋ جولدارى جان-جاقتى قاراستىرىلدى. ءىس-شاراعا رەننە قالاسىنداعى قازاقستان رەسپۋبليكاسىنىڭ قۇرمەتتى كونسۋلى جانار اۆارد-تۇرەبايەۆا، EDU Stream حالىقارالىق كومپانيالار توبىنىڭ ديرەكتورى ناتاليا مۋحامەدجانوۆا، «سانالى ءبىلىم باسپاسى» باسپاسىنىڭ PhD دوكتورى دانا جانتەميروۆا، بوستاندىق اۋداندىق ءبىلىم ءبولىمىنىڭ باسشىسى ايگۇل قاسىمبەك جانە اۋدان مەكتەپتەرىنىڭ ديرەكتورلارى قاتىستى.
ايگۇل قاسىمبەكتىڭ ايتۋىنشا، سەميناردىڭ باستى ماقساتى – فرانسۋز ءتىلىن وقىتۋدا زاماناۋي تاسىلدەردى ەنگىزۋ، تابىستى تاجىريبەلەرمەن ءبولىسۋ جانە وقىتۋدىڭ ساپاسىن ارتتىرۋعا باعىتتالعان جاڭا ادىستەمەلەردى تالقىلاۋ. بۇل – وقۋشىلاردىڭ شەتەل تىلىنە دەگەن قىزىعۋشىلىعىن ارتتىرىپ، حالىقارالىق ءبىلىم ستاندارتتارىنا ساي دايارلاۋ ءۇشىن ماڭىزدى قادام.
سەميناردا №22، №105 جانە №145 مەكتەپتەرىنىڭ فرانسۋز ءتىلى ءپانى مۇعالىمدەرى ءوز تاجىريبەلەرىمەن ءبولىسىپ، سيفرلىق تەحنولوگيالاردى قولدانۋ ارقىلى ءپاندى ءتيىمدى ءارى قىزىقتى تۇردە جەتكىزۋ جولدارىن ۇسىندى. يننوۆاسيالىق تاسىلدەر، سونىڭ ىشىندە ينتەراكتيۆتى پلاتفورمالار مەن ونلاين رەسۋرستاردىڭ ماڭىزى اتاپ ءوتىلدى.
سەمينار اياسىندا №22 مەكتەپ-گيمنازياسىندا جاڭا فرانسۋز ءتىلى كابينەتىنىڭ اشىلۋ سالتاناتى ءوتتى. زاماناۋي قۇرالدارمەن جابدىقتالعان كابينەت وقۋشىلاردىڭ ءتىلدى مەڭگەرۋ ۇدەرىسىن جەڭىلدەتىپ، ولارعا مادەني تۇرعىدان دا جاڭا كوكجيەكتەر اشادى. بۇل – وقۋشىلار ءۇشىن تەك ءتىل ۇيرەنۋ عانا ەمەس، فرانسيا مادەنيەتىن تەرەڭىرەك تانۋدىڭ دا مۇمكىندىگى.
ءىس-شارا بارىسىندا وقۋشىلار دايىنداعان «سۋرەتتەرىمىزدەگى فرانسيا نۇرى» اتتى شىعارماشىلىق كورمە ەرەكشە اسەر قالدىردى. سونىمەن قاتار، فرانسۋز تىلىندە وقىلعان ولەڭدەر مەن اندەر سەمينار قوناقتارىنىڭ ىستىق ىقىلاسىنا يە بولدى. №22 مەكتەپ-گيمنازيانىڭ 10-سىنىپ وقۋشىسى، رەسپۋبليكالىق پاندىك وليمپيادانىڭ فرانسۋز ءتىلى بويىنشا ءىى ورىن يەگەرى جانەل تەن ارنايى قۇتتىقتاۋعا يە بولدى.
فرانسۋز ءتىلىن وقىتۋعا ارنالعان بۇل سەمينار – قازاقستان مەن فرانسيا اراسىنداعى مادەني-تانىمدىق بايلانىستاردى تەرەڭدەتۋگە باعىتتالعان ماڭىزدى باستاما. مۇعالىمدەر مەن ءبىلىم سالاسىنىڭ ماماندارى ءۇشىن تاجىريبە الماسۋدىڭ وسىنداي الاڭدارى وقىتۋدىڭ ساپاسىن ارتتىرىپ، حالىقارالىق ستاندارتتارعا ساي باسەكەگە قابىلەتتى ۇرپاق تاربيەلەۋگە مۇمكىندىك بەرەدى.