ق ر وقۋ-اعارتۋ ءمينيسترىنىڭ بۇيرىعىمەن «جاڭا وزگەرىستەردىڭ 1000 كوشباسشىسى» جوباسى شەڭبەرىندە رەسپۋبليكالىق كادر رەزەرۆىنە قابىلدانعان كانديداتتاردىڭ ءتىزىمى بەكىتىلدى، دەپ حابارلايدى Almaty-akshamy.kz.
وعان ءبىلىم بەرۋ ۇيىمدارىنىڭ باسشىلارى لاۋازىمىنان ۇمىتكەر 208 ادام كىردى. بۇل تۋرالى ق ر وقۋ-اعارتۋ مينيسترلىگىنىڭ باسپا ءسوز قىزمەتى حابارلادى.
مەملەكەت باسشىسىنىڭ تاپسىرماسى بويىنشا وقۋ-اعارتۋ مينيسترلىگى 2023 جىلدان باستاپ پرەزيدەنتتىك جاستار كادرلىق رەزەرۆىنىڭ ۇلگىسى بويىنشا ءبىلىم بەرۋدەگى وزگەرىستەر كوشباسشىلارىن ىرىكتەۋ جانە دايارلاۋ تەتىگىن ازىرلەۋ جانە بەكىتۋ جونىندەگى جوبانى ىسكە اسىرۋدا.
باستاپقى كەزەڭدە بارلىعى 8068 ءوتىنىم ءتۇستى. ۇمىتكەرلەر قۇزىرەتتىلىكتەرىن باعالاۋ ءۇشىن تەستىلەۋدەن ءوتتى. ەكىنشى كەزەڭدە – ءۇش دەڭگەيلى وقىتۋ، ءۇشىنشى كەزەڭدە – ەلدىڭ جەتەكشى مەكتەپتەرىندە تاعىلىمدامادان ءوتۋ، ءتورتىنشى كەزەڭدە – قورىتىندى باعالاۋ جانە قورىتىندى كەزەڭدە – مينيسترلىك جانىنداعى كوميسسيامەن اڭگىمەلەسۋ بولدى. بارلىق بەس كەزەڭنىڭ قورىتىندىسى بويىنشا رەسپۋبليكالىق كادر رەزەرۆىنە 208 كانديدات ءوتتى.
ىرىكتەۋدىڭ بارلىق كەزەڭدەرىنەن وتكەندەرگە سەرتيفيكات بەرىلەدى. ونىڭ نەگىزىندە ۇمىتكەرلەر كونكۋرستىق راسىمدەردەن وتپەي-اق ءبىرىنشى باسشىنىڭ بوس ورنىنا تاعايىندالاتىن بولادى. سونداي-اق، بارلىق كەزەڭدەردەن ءساتتى وتكەن جانە سەرتيفيكات العاندارعا «جەتەكشى-كوشباسشى» بىلىكتىلىك ساناتى بەرىلەدى.
جاڭا بۋىن مەنەدجەرلەرى جاڭا مەكتەپتەردى، ونىڭ ىشىندە «جايلى مەكتەپ» ۇلتتىق جوباسى اياسىندا سالىنىپ جاتقان ءبىلىم وشاقتارىن كادرلىق جاعىنان قامتاماسىز ەتۋ ماسەلەسىن شەشۋگە جاردەمدەسەدى دەپ جوسپارلانۋدا.
ايتا كەتەيىك، بۇل جوبا بيىل دا جالعاسادى. وعان بارلىق تىلەك بىلدىرگەن پەداگوگتەر قاتىسا الادى.