اعىمداعى جىلدىڭ سوڭىنا دەيىن بارلىق 206 مەملەكەتتىك مەكتەپتە، 8 ينتەرناتتا جانە 193 مەملەكەتتىك بالاباقشادا قاۋىپسىزدىك جۇيەسىن ەنگىزۋ اياقتالادى.
بۇل تۋرالى ءبىلىم بەرۋ قىزمەتكەرلەرىنىڭ تامىز كەڭەسىندە اكىم ەربولات دوسايەۆ مالىمدەدى، دەپ حابارلايدى Almaty-akshamy.kz
"بالالاردىڭ قاۋىپسىزدىگى-بالالاردى قورعاۋ سالاسىنداعى مەملەكەتتىك ساياساتتىڭ باستى باسىمدىقتارىنىڭ ءبىرى. سوندىقتان بۇل جوبا جالپى قۇنى 7،6 ملرد تەڭگە بولاتىن ءۇش جىلدىق سەرۆيستىك مودەل اياسىندا قارجىلاندىرىلادى"، - دەدى ول.
سونداي-اق، ول الماتىدا العاش رەت 2023 جىلدىڭ 1 قىركۇيەگىنەن باستاپ 30 مەكتەپتە "مەكتەپ اۆتوبۋسى" جوباسى ىسكە اسىرىلاتىنىن اتاپ ءوتتى. جەرگىلىكتى بيۋدجەت ەسەبىنەن 100 اۆتوبۋس 5،2 ملرد. تەڭگەگە ساتىپ الىنىپ، تاسىمالداۋ قىزمەتتەرىنە 1،4 ملرد. تەڭگە ءبولىندى.
"2023 جىلى جالپى قامتۋ 7،7 مىڭنان استام بالانى قۇرايدى. ءبىز بۇل جوبانى كەڭەيتۋدى جوسپارلاپ وتىرمىز، كەلەسى جىلعا 11 مەكتەپكە تاعى 50 اۆتوبۋس ساتىپ الۋدى جوسپارلاۋدامىز"، – دەدى قالا باسشىسى.