ءبىلىم جانە عىلىم ءبىرىنشى ۆيسە-مينيسترى شولپان كارينوۆا ۇلتتىق بىلىكتىلىك تەستىن تاپسىرۋ كەزىندە قايتىس بولعان پەداگوگ جايلى پىكىر ءبىلدىردى، دەپ حابارلايدى Almaty-akshamy.kz.
«الماتىلىق ارىپتەسىمىزدىڭ وتباسى مەن جاقىندارىنا كوڭىل ايتامىن. ءبىلىم جانە عىلىم مينيسترلىگى تەلەگرامما جولدادى. الماتى قالالىق ءبىلىم باسقارماسى مارقۇمنىڭ وتباسىنا قاجەتتى كومەك كورسەتەدى. ارىپتەسىمىزدىڭ سوزىلمالى دەرتكە شالدىققانى جانە ونىڭ جۇرەك اۋرۋى بويىنشا ەسەپتە تۇرعانى بەلگىلى. ءبىلىم سالاسىنىڭ وكىلدەرى ارىپتەسىمىزدىڭ تۋىستارىنىڭ ۇيىنە بارعاندا ونىڭ سوڭعى كەزدەرى ءوزىن ناشار سەزىنىپ جۇرگەنىن، تەستىلەۋ كۇنى تاڭەرتەڭ دە ءوزىن جايسىز سەزىنگەنىن ايتقان. جاقىندارى ۇيدە قالۋعا كەڭەس بەرگەن. ەستەرىڭىزگە سالا كەتەيىن، مۇعالىمدەر دەنساۋلىعى ناشارلاپ، ءوزىن ناشار سەزىنگەن جاعدايدا تەستىلەۋگە بارماۋىنا نەمەسە كۇنىن باسقا مەرزىمگە اۋىستىرۋىنا بولادى. مۇنداي مۇمكىندىك قاراستىرىلعان» دەپ جازدى شولپان كارينوۆا Facebook پاراقشاسىندا.
ايتا كەتەيىك، پەداگوگ العاش رەت 2020 جىلعى 1 قىركۇيەكتەن باستاپ ءمۇعالىم قىزمەتىن اتقارا باستاعان. سوندىقتان جاڭادان كەلگەن ءمۇعالىم رەتىندە ول ساناتسىز جۇمىس ىستەدى جانە وعان اتتەستاسيادان ءوتۋ مىندەتتى بولمادى.
«ءبىزدىڭ اقپاراتىمىزعا سايكەس، پەداگوگ ءوزىن ساۋاتتى، تالانتتى ۇستاز رەتىندە تانىتقان. تۋىستارىنىڭ ايتۋىنشا، ول ءوز بىلىمىنە سەنىمدى بولعان. سول سەبەپتى ۇبت-عا مەرزىمىنەن بۇرىن جازىلعان. وسىنداي قايعىلى جاڭالىقتاردى پايدالانىپ، الەۋمەتتىك جەلىلەردە مۇعالىمدەردىڭ وز-وزىنە قول جۇمساۋىنىڭ بىرنەشە وقيعاسى تۋرالى فەيكتەر كوپتەپ تارالىپ جاتىر. بۇل - جالعان اقپارات» دەيدى شولپان كارينوۆا.
ەسكە سالا كەتەيىك، الماتىدا ۇلتتىق بىلىكتىلىك تەستىن تاپسىرىپ جاتقان ءمۇعالىم كوز جۇمدى. كەيىننەن تەستىلەۋ كەزىندە قايتىس بولعان ءمۇعالىمنىڭ جۇرەك اۋرۋىمەن ەسەپتە تۇرعانى بەلگىلى بولدى.