تاۋەلسىزدىك جىلدارىنداعى ءبىلىم جۇيەسى تۋرالى كىتاپ جارىق كوردى
الماتىدا ەل تاۋەلسىزدىگىنىڭ 30 جىلدىعى اياسىندا «قازاقستان رەسپۋبليكاسىنداعى ءبىلىم بەرۋ جۇيەسىن جاڭعىرتۋ» كىتابىنىڭ تۇساۋكەسەرى ءوتتى، دەپ حابارلايدى almaty-akshamy.kz BAQ.kz سىلتەمە جاساپ.
كىتاپتىڭ اۆتورى - ق ر ەڭبەك سىڭىرگەن قايراتكەرى، پەداگوگيكا عىلىمدارىنىڭ دوكتورى، پروفەسسور، ق ر ۇلتتىق عىلىم اكادەمياسىنىڭ اكادەميگى، رەسەي مەملەكەتتىك ءبىلىم اكادەمياسىنىڭ اكادەميگى الما ءابىلقاسىموۆا.
كىتاپتا ەلىمىز تاۋەلسىزدىك العان 30 جىلدا ءبىلىم جۇيەسى قالاي دامىپ، جاڭعىرعانى باياندالادى. سونداي-اق كىتاپ قازاق، ورىس جانە اعىلشىن تىلدەرىندە جارىق كوردى.
تۇساۋكەسەر جيىنى بارىسىندا اۆتور كىتاپتى جازۋعا نە سەبەپ بولعانىن ايتىپ بەردى.
- كىتاپتى جازۋعا قالام الۋ سەبەبىم - وسى 30 جىلدىڭ ىشىندە ەلىمىزدە ءبىلىم جۇيەسىنىڭ سونشالىقتى دامىعانى، ءبىلىم جۇيەسىنە مەملەكەت تاراپىنان كوپتەگەن قولداۋ كورسەتىلىپ، قوماقتى جۇمىس ىستەلگەنى ارقاۋ بولدى. سوندىقتان 30 جىلدا ءبىلىم جۇيەسىندە جاسالعان جۇمىستىڭ بارلىعى كىتاپتا جازىلدى. مەملەكەت، ەلباسى تاراپىنان قابىلدانعان مەملەكەتتىك باعدارلامالار، ءبىلىم جانە عىلىمدى دامىتۋعا ارنالعان مەملەكەتتىك باعدارلامالار، تاۋەلسىزدىك العان كەزدەگى قيىنشىلىقتار. سونداي-اق 1992 جىلى قابىلدانعان "ءبىلىم تۋرالى" زاڭ، وسى زاڭنىڭ اياسىندا تالاي ىسكە اسقان شارۋالار، وقۋلىق جاساۋ تاراپىنان قابىلدانعان مەملەكەتتىك قۇجاتتار بارلىعى قامتىلدى، - دەيدى ءابىلقاسىموۆا.
الماتى قالاسى قوعامدىق كەڭەسىنىڭ ءتوراعاسى، ق ر جوعارى وقۋ ورىندارى قاۋىمداستىعىنىڭ پرەزيدەنتى، ەكونوميكا عىلىمدارىنىڭ دوكتورى، پروفەسسور راحمان الشانوۆ اۆتور تاۋەلسىزدىك جىلدارى ءبىلىم سالاسىندا ەڭبەك ەتىپ، سول تۇستاعى جاعدايمەن ەتەنە تانىس ەكەنىن ايتتى.
- كىتاپتىڭ اۆتورى - وسى 30 جىلدىق تاريحتى جاساعان ادامنىڭ ءبىرى. ءقازىر ەل تاۋەلسىزدىگىنىڭ ءبىرىنشى كۇنىنەن باستاپ بارلىق سالادا كوپتەگەن قاتەلىك كەتتى دەگەن داۋلار ايتىلادى. اۆتور سول كەزدەگى جاعدايدى ناقتى دالەلمەن كەلتىرىپ جازعان. ويتكەنى ءوزى سول ۇدەرىستىڭ ىشىندە بولىپ، ءجۇرىپ وتكەن تاريحتى بايانداعان. بۇل جان-جاقتى زەرتتەلگەن، تولىق قامتىلعان العاشقى ەڭبەك. سونىسىمەن قازىرگى كوپتەگەن سۇراققا جاۋاپ بەرىپ وتىر، - دەيدى الشانوۆ.