ءبىلىم جانە عىلىم ءمينيسترى اسحات ايماعامبەتوۆ الماتى اكىمدىگىنە بەرىلەتىن قوسىمشا وكىلەتتىكتەر تۋرالى پىكىر ءبىلدىردى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
«جۋىردا مەملەكەت باسشىسى الماتى قالاسىنىڭ ماڭىزدى نىسانىنىڭ ءبىرى – وقۋشىلار سارايىندا بولدى. پرەزيدەنت بالالارمەن اڭگىمەلەسىپ، وندا جاسالعان جاعدايمەن جانە سارايداعى جاڭعىرتۋ جۇمىستارىنىڭ ناتيجەسىمەن تانىستى. الماتىدا قوسىمشا ءبىلىم بەرۋدى دامىتۋ جۇمىستارى جاقسى جولعا قويىلعانىن اتاپ وتكىم كەلەدى.
اتاپ ايتقاندا:
- قولدانىستاعى وقۋشىلار سارايىن تولىقتاي جاڭعىرتىپ قانا قويماي، سونىمەن بىرگە زاماناۋي ەكى يننوۆاسيالىق شىعارماشىلىق ورتالىعى پايدالانۋعا بەرىلەدى.
- كەلەسى جىلى ەسكى عيماراتتاردى بۇزىپ، 3 وقۋشىلار ءۇيىنىڭ قۇرىلىسىن سالۋ جوسپارلانىپ وتىر. قازىرگى كۇنى جوبالاۋ جۇمىستارى باستالىپ كەتتى.
- مەكتەپتەردىڭ سپورت الاڭدارىن قايتا جاڭعىرتۋ جۇمىستارى جۇرگىزىلۋدە.
- جاس تۋريستەر مەن ناتۋراليستەر (تابيعاتتانۋشى) ستانسيالارى جاڭارتىلادى.
- مەملەكەتتىك ءبىلىم بەرۋ، شىعارماشىلىق جانە سپورتتىق تاپسىرىستار ورنالاستىرىلۋدا.
جالپى، قازىرگى تاڭدا الماتى قالاسى اكىمدىگىندە باسقا وڭىرلەرمەن سالىستىرعاندا ءبىلىم سالاسىن دامىتۋدا بارىنشا ءبىرتۇتاس جانە دايەكتى ساياسات جۇرگىزىلىپ جاتقانىن مويىنداۋ كەرەك» دەپ جازدى مينيستر Facebook پاراقشاسىندا.
سول سەبەپتى قالا باسشىلىعىنىڭ سالانى دامىتۋ ۇستانىمىن، مەگاپوليستىڭ قولدا بار قارجىلىق مۇمكىندىكتەرى مەن كادرلىق الەۋەتىن ەسكەرە وتىرىپ، مينيسترلىك الماتى قالاسىنىڭ اكىمدىگىنە ءبىلىم بەرۋ سالاسىندا قوسىمشا وكىلەتتىكتەر بەرۋ تۋرالى شەشىم قابىلداعان.
«مينيسترلىكتىڭ نورماتيۆتىك اكتىلەرىندەگى ارنايى شارتتار مەن قۇزىرەتتەردى قاراستىرامىز. سونىمەن قاتار قالانىڭ ءبىلىم بەرۋ ۇيىمدارى ءبىزدىڭ نەگىزگى يننوۆاسيالىق الاڭدارىمىزعا اينالادى. ءوز تاراپىنان اكىمدىك بارلىق جاڭا باستامانى قارجىلاي جانە ۇيىمداستىرۋشىلىق جاعىنان قولداۋعا مىندەتتەمە الادى. ال مينيسترلىك بارلىق جاريالانعان مىندەتتەمەنىڭ ورىندالۋىن باقىلاۋدا ۇستايدى»، - دەپ اتاپ ءوتتى اسحات ايماعامبەتوۆ.