قۇجاتتاردى قابىلداۋ 16 شىلدەدە باستالعان، 25 شىلدەدە اياقتالادى.
ەلىمىزدە ءبىلىم بەرۋ گرانتتارىن تاعايىنداۋ كونكۋرسىنا قاتىسۋ ءۇشىن قۇجاتتاردى قابىلداۋ جالعاسىپ جاتىر، دەپ حابارلايدى Almaty-akshamy.kz قازاقستان رەسپۋبليكاسىنىڭ بiلiم جانە عىلىم مينيسترلىگىنە سىلتەمە جاساپ.
قۇجاتتاردى راسىمدەۋ Egov ەلەكتروندىق ۇكىمەت پورتالى ارقىلى ونلاين جۇزەگە اسىرىلادى. جوعارى وقۋ ورىندارىندا ۆيرتۋالدى قابىلداۋ كوميسسيالارى جۇمىس ىستەيدى. ولار تالاپكەرلەرگە بەينە بايلانىس ارقىلى كەڭەس بەرەدى.
مەملەكەتتىك ءبىلىم بەرۋ گرانتتارىن تاعايىنداۋ كونكۋرسىنا قاتىسۋعا قۇجاتتاردى ەلەكتروندى تۇردە تاپسىرۋ ءۇشىن تالاپكەرلەرگە نە قاجەت ەكەنىن وسى جەردەن كورە الاسىزدار.
ەگەر تالاپكەر «التىن بەلگى» يەگەرى بولسا نەمەسە وتانسۇيگىشتىك جانە بەلسەندى ازاماتتىق ۇستانىمى ءۇشىن ەرەكشەلىك بەلگىسىمەن ماراپاتتالسا، وندا ول باسقا تالاپكەرلەرمەن بالدارى تەڭ بولعان جاعدايدا باسىم قۇقىققا يە بولادى. وليمپيادالار مەن سپورتتىق جارىستاردىڭ جەڭىمپازدارى دا باسىم قۇقىققا يە.
ءوتىنىش بەرۋشىنىڭ مۇنداي جەتىستىكتەرى ەسكەرىلۋى ءۇشىن راستايتىن قۇجاتتاردىڭ كوشىرمەلەرىن دە جۇكتەۋ قاجەت. شەت ءتىلىن مەڭگەرگەنىن راستايتىن حالىقارالىق سەرتيفيكات بولعان كەزدە ءوتىنىش بەرۋشى حالىقارالىق ءتىل سەرتيفيكاتىنىڭ اتاۋىن، بالىن كورسەتەدى جانە ەلەكتروندىق سەرتيفيكاتتى تىركەيدى.
ەستەرىڭىزگە سالا كەتەيىك، كونكۋرسقا قاتىسۋ ءۇشىن قۇجاتتاردى تاپسىرۋ كەزىندە مەديسينالىق انىقتاما تالاپ ەتىلمەيدى. مەديسينالىق انىقتامانى تامىز ايىندا ۋنيۆەرسيتەتكە قابىلداۋ كەزىندە تاپسىرۋ قاجەت.