2023 جىلعى 30 قىركۇيەكتە اباي ۋنيۆەرسيتەتىندە 2008-2017 جىلدار ارالىعىندا اباي اتىنداعى قازۇپۋ-دى باسقارعان بەلگىلى عالىم-پەداگوگ، اكادەميك س.پرالييەۆتى ەسكە الۋعا ارنالعان «ءبىلىم بەرۋ ستراتەگيالارى: بولاشاق كادرلاردى دايارلاۋ» حالىقارالىق پەداگوگيكالىق فورۋم ءوتتى.
فورۋمعا اباي اتىنداعى قازۇپۋ رەكتورى بولات تىلەپ، ق ر عىلىم جانە جوعارى ءبىلىم ۆيسە-مينيسترى دارحان احمەد-زاكي، الماتى قالاسى مادەنيەت باسقارماسىنىڭ باسشىسى عاني مايلىبايەۆ، ەلىمىزدىڭ مەملەكەت جانە قوعام قايراتكەرلەرى، قازاق زيالىلارىنىڭ كورنەكتى وكىلدەرى، وتاندىق جانە شەتەلدىك عالىمدار قاتىستى.
ءىس-شارا س.ج.پرالييەۆتىڭ عىلىمي ەڭبەكتەرى كورمەسىنىڭ اشىلۋىمەن باستالىپ، وتباسىنىڭ دەمەۋشىلىك قولداۋىمەن اكادەميك س.پرالييەۆ اتىنداعى كونفەرەنس-زالدىڭ سالتاناتتى اشىلۋىمەن جالعاستى.
فورۋمدى رەكتور بولات تىلەپ اشىپ، ءىس-شارانىڭ ماڭىزدىلىعىن، عالىمنىڭ بۇكىل سانالى عۇمىرىن ءبىلىم بەرۋ جۇيەسىن جەتىلدىرۋگە جانە جوعارى بىلىكتى كادرلار دايارلاۋعا، سونداي-اق جالپى قازاقستاندىق عىلىمدى دامىتۋعا قوسقان ۇلەسىن ەرەكشە اتاپ ءوتتى.
ۆيسە-مينيستر دارحان احمەد-زاكي ەل ۇكىمەتى مەن ق ر عىلىم جانە جوعارى ءبىلىم مينيسترلىگىنىڭ قۇتتىقتاۋ حاتىن وقىپ بەردى. فورۋمنىڭ ماڭىزدىلىعىن ايتا كەلە، مۇنداي شارالار ەلىمىزدىڭ تاريحى مەن وزىق ءداستۇرىن دارىپتەۋگە، ۇرپاقتار ساباقتاستىعىن ساقتاۋعا قىزمەت ەتەتىنىن ايتتى.
فورۋم بارىسىندا «اكادەميك س.پرالييەۆ: ومىرلىك جولى جانە عىلىمي جەتىستىكتەرى» بەينەفيلمى كورسەتىلىپ، عالىمنىڭ ءومىرى مەن شىعارماشىلىعىنا ارنالعان كىتاپتاردىڭ تۇساۋكەسەر ءراسىمى ءوتتى. ءىس-شارا «ۇزدىك عىلىمي باسىلىم» كونكۋرسىنىڭ جەڭىمپازدارىن ماراپاتتاۋمەن اياقتالدى.
حالىقارالىق فورۋم ءبىلىم بەرۋدى دامىتۋ جانە بولاشاققا پەداگوگيكالىق كادرلار دايارلاۋ ستراتەگيالارىن تالقىلاۋ ءۇشىن وتاندىق جانە شەتەلدىك ساراپشىلاردىڭ باسىن قوستى. فورۋم اياسىندا «قازاقستاندا پەداگوگيكالىق ءبىلىم بەرۋدى عىلىمي-زەرتتەۋشىلىك سۇيەمەلدەۋ مەن تۇجىرىمداۋعا سۇرانىس» تاقىرىبىندا پانەلدىك پىكىرتالاس؛ «مەكتەپ پەن ۋنيۆەرسيتەت ديالوگى: جاراتىلىستانۋ-گەوگرافيالىق سيكل پاندەرىن وقىتۋ ادىستەمەسىن جاڭارتۋ» تاقىرىبىندا دوڭگەلەك ۇستەل، ءبىلىم بەرۋ مەن عىلىمنىڭ نەگىزگى ماسەلەلەرى تالقىلانعان زەرتتەۋ توپتارىنىڭ وتىرىستارى، سونداي-اق ۇزدىك وقىتۋشىلاردىڭ شەبەرلىك سىنىپتارى ءوتتى.