13 ءمۇعالىم تەك قاعاز جۇزىندەگى جالاقىنى الىپ وتىرعان.
وبلىستىق انتيكور دەپارتامەنتى الماتى وبلىسىنىڭ ءبىلىم بەرۋ سالاسىندا «جوق جاندارعا» 609 ميلليون تەڭگەدەن استام قارجى اۋدارىلعانى تۋرالى مالىمدەدى، دەپ حابارلادى Almaty-akshamy.kz.
وسى فاكتىلەر بويىنشا التى ەسەپشىگە قاتىستى قىلمىستىق ءىس قوزعالدى. ولاردىڭ ءبىرى بۇعان دەيىن سوتتالىپ، التى جىلعا باس بوستاندىعىنان ايىرىلعان. 81 ملن تەڭگە زالال تولىعىمەن وتەلدى، دەپ ءتۇسىندىردى ۆەدومستۆو.
سونداي-اق ەسەپشىلەر مۇعالىمدەرمەن ءسوز بايلاسىپ، جالاقىنى كوبەيتكەن ءتورت فاكتى انىقتالدى. مۇنداي بۇزۋشىلىقتاردىڭ جالپى سوماسى 81 ميلليون تەڭگە بولدى.
«ءبىر فاكتى بويىنشا ەسەپشى مەن ءتورت ءمۇعالىم 3 جىلدان 6 جىلعا دەيىن باس بوستاندىعىنان ايىرىلىپ، قىلمىستىق جاۋاپكەرشىلىككە تارتىلىپ، كەلتىرىلگەن 62 ميلليون تەڭگە زالال تولىعىمەن وتەلدى» دەپ جازدى انتيكور.
مامانداردىڭ ايتۋىنشا، مەكتەپ قىزمەتكەرلەرىنىڭ اقشاسىن وسىلايشا ۇرلاۋ مۇمكىندىگى قازىناشىلىق دەرەكتەر بازاسىمەن Parus-Kaz جانە 1س جۇيەلەرىندە سايكەستىكتىڭ جوقتىعىنان بولعان.