قازاق مەملەكەتتىك سيركىندە ساحا رەسپۋبليكاسىنىڭ سيرك ارتىستەرىنىڭ ەتنو-شوۋىن تانىستىرۋعا ارنالعان باسپا ءسوز كونفەرەنسياسى ءوتتى.
قالا كۇنىنە وراي ۇيىمداستىرىلعان ءىس-شاراعا الماتى قالاسى مادەنيەت باسقارماسى باسشىسىنىڭ ورىنباسارى نايليا مۋليۋكوۆا، ساحا رەسپۋبليكاسىنىڭ مادەنيەت جانە رۋحاني دامۋ ءمينيسترى (ياكۋتيا) يۋريي كۋپريانوۆ، مارفا جانە سەرگەي راستورگۋيەۆ اتىنداعى ياكۋتيا مەملەكەتتىك سيركىنىڭ ديرەكتورى سەرگەي راستورگۋيەۆ، گاسترولدىك توپتىڭ جەتەكشىسى الەكساندر پوسەلسكيي، گاسترولدىك ترۋپپانىڭ جەتەكشىسى جانە سيرك ءارتىسى رومان رومانوۆ قاتىسىپ، جۋرناليستەردىڭ سۇراعىنا جاۋاپ بەردى.
ودان سوڭ ساحا حالقىنىڭ شىعۋ تەگى تۋرالى باياندالاتىن «مامونت جەرى» اتتى سيرك شوۋىن ۇسىندى. بۇل – ساحا حالقىنىڭ كونە زاماننان بەرگى تاريحى، مامونتتاردىڭ جەر بەتىندە مەكەندەگەن كەزى، كەرەمەت تابيعاتى مەن جانۋارلار الەمى تۋرالى قويىلىم. بالالار ءۇيىنىڭ تاربيەلەنۋشىلەرى، الەۋمەتتىك وسال وتباسىلاردىڭ بالالارى ءبىرىنشى بولىپ تاماشالادى.
بۇل ەتنو-شوۋ ءۇشىن ارنايى 200 ەكسكليۋءزيۆتى اۆتورلىق كوستيۋم، ءساندى بارەرلەر مەن دەكوراسيا جاسالعان. ءتۇرلى جانرداعى 60-تان استام سيرك ءارتىسى، سونداي-اق جارىق ەففەكتىلەرى مەن ديناميكالىق مۋزىكا قولدانىلدى. ساحا رەسپۋبليكاسىنىڭ مادەنيەت جانە رۋحاني دامۋ ءمينيسترى يۋريي كۋپريانوۆتىڭ ايتۋىنشا، سيركتىڭ ەڭ باستى ماقساتى – ساحا حالقىنىڭ مادەني قۇندىلىقتارىن، ءداستۇرىن ناسيحاتتاۋ، قازاقست ان مەن ياكۋتيا اراسىندا مادەني قارىم-قاتىناستى نىعايتۋ. سونداي-اق، مينيستر ەكى ەل اراسىنداعى رۋحاني قۇندىلىقتاردى دامىتۋ ماقساتىندا سيركتەر مەن كينوستۋديالار اراسىندا كەلىسىم-شارت جاسالاتىنىن ايتتى.
گاسترولدىك باعدارلامادا ياكۋتيادان كەلگەن ارتىستەر كورەرمەندى ساحا حالقىنىڭ مادەنيەتىمەن، تاريحىمەن جانە ەرتەگىلەرىمەن تانىستىردى. ۇيىمداستىرۋشىلاردىڭ ايتۋىنشا، بۇل شوۋدا حالىقارالىق دەڭگەيدەگى كاسىبي ارتىستەر توبى جۇمىس ىستەدى. مارفا جانە سەرگەي راستورگۋيەۆ اتىنداعى ياكۋتيا مەملەكەتتىك سيركىنىڭ ديرەكتورى سەرگەي راستورگۋيەۆ سيرك بيىل گاسترولدىك ساپارمەن استانا، شىمكەنت قالالارىندا دا ونەر كورسەتەتىنىن، ال 2024 جىلدىڭ مامىرىندا قاراعاندى قالاسىندا بولاتىنىن ايتىپ ءوتتى.
قويىلىمنىڭ العاشقى مينۋتتارىندا كورەرمەن مامونت جەتەكتەگەن باقسىنىڭ گاۋھار تاستارىنىڭ دىبىستارى ارقىلى مامونتتار مەكەندەگەن ەجەلگى تەمىر ءداۋىرىنە ەنەدى. گيمناستتار، اكروباتتار، ەكۆيليبريستەر مەن جونگلەرلەر ەرەكشە شوۋ ۇسىندى.
ونەرپازداردىڭ ساحنالىق كيىمدەرى مەن رەكۆيزيتتەردىڭ شىنايىلىعى سونداي، ساحالىقتاردىڭ ۇلتتىق ەرەكشەلىكتەرىن بىردەن اڭعارۋعا بولادى.
«ساحا رەسپۋبليكاسىنىڭ مەملەكەتتىك سيركىنىڭ گاسترولدىك ساپارى قالا كۇنىمەن تۇسپا-تۇس كەلگەنىنە قۋانىشتىمىز. سيرك ونەرپازدارىنىڭ بىرازىمەن بۇرىننان تانىسپىز. وزدەرىڭىز بىلەتىندەي، جاقىندا الماتىدا حالىقارالىق سيرك ونەرى فەستيءۆالى ءوتىپ، ساحالىق ارتىستەر ءبىرىنشى ورىن العان ەدى. سوندىقتان بۇل ەتنو-شوۋدىڭ الماتىلىقتار مەن قالا قوناقتارىنا ۇنايتىنى ءسوزسىز»، –دەدى الماتى قالاسى مادەنيەت باسقارماسى باسشىسىنىڭ ورىنباسارى نايليا مۋليۋكوۆا.
ساحا رەسپۋبليكاسىنىڭ مادەنيەت جانە رۋحاني دامۋ ءمينيسترى يۋريي كۋپريانوۆ باستاعان دەلەگاسيا الماتىداعا گاسترولدىك ساپاردىڭ باستالۋىنا ەرەكشە ءمان بەرگەن. ول سيرك الماتىدا ءبىر اي بويى جۇمىس ىستەيتىنىن اتاپ ءوتتى. سونىمەن قاتار، «سارى-ارقا» كينوتەاترىندا ياكۋت كينوسىنىڭ كۇندەرى باستالادى. 20 قىركۇيەككە دەيىن كۇن سايىن ساعات 19.00-دەن باستاپ ياكۋت كينوسىنىڭ ۇزدىك توپتامالارىنىڭ تەگىن كورسەتىلىمدەرى وتەدى.
