جەتىسۋ وبلىسىندا بيكەن ريموۆا اتىنداعى دراما تەاترىنا اكادەميالىق مارتەبەسى بەرىلۋىنە وراي سالتاناتتى شارا ءوتتى، دەپ حابارلايدى aqshamnews.kz
مەرەكەلىك جيىنعا وبلىس اكىمى بەيبىت يسابايەۆ، ارنايى كەلگەن قوناقتار - قازاقستاننىڭ حالىق ارتىستەرى بولات ءابدىلمانوۆ، ليديا كادەنوۆا، دۋلىعا اقمولدا جانە باسقا دا ەلىمىزگە بەلگىلى ونەر يەلەرى، جەرگىلىكتى تەاتر ۇجىمى، زيالى قاۋىم وكىلدەرى قاتىستى.
الدىمەن تەاتر ماڭدايشاسىنداعى جاڭارعان اتاۋ سالتاناتتى تۇردە اشىلدى. مۇنان سوڭ جيىن تەاتر عيماراتىنىڭ ىشىندە جالعاسىپ، قوناقتار بيكەن ريموۆا بيۋستىنە گۇل شوقتارىن قويدى.
جەتىسۋلىق تەاتر ۇجىمىن قۋانىشىمەن قۇتتىقتاعان وبلىس اكىمى بەيبىت يسابايەۆ:
- بيىل ءبىزدىڭ تالدىقورعان تەاترى ءۇشىن مەرەكەلى جىل بولدى. بۇعان دەيىن قىركۇيەك ايىندا ونەر ورداسىنىڭ جارتى عاسىرلىق بەلەسى مەن ءداستۇرلى «BIKEN FEST» حالىقارالىق فەستيۆالىن قاتار وتكىزگەن بولاتىنبىز. وزدەرىڭىز بىلەسىزدەر، پرەزيدەنت بيكەن ريموۆا دراما تەاترى اكادەميالىق مارتەبە الۋعا لايىق دەپ ءوزىنىڭ وڭ باعاسىن بەرىپ، جاقسىلىق ەسەلەنىپ، تەاتر سول اتاققا قول جەتكىزىپ وتىر. بۇل اتاققا يە بولۋ بۇگىنگى ونەرپازداردىڭ عانا جەتىستىگى ەمەس، وسى تەاتردا تەر توگىپ، ەڭبەك ەتكەن الدىڭعى تولقىن اعا-اپالارىمىزدىڭ سالىپ كەتكەن سارا جولىنىڭ جاڭا داڭعىلعا ۇلاسۋى دەپ بىلەمىز. سونىمەن قاتار بۇل بەلەس بيكەن ريموۆا اتىنداعى اكادەميالىق دراما تەاترىنىڭ جاڭا ءداۋىرى، جۇلدىزدى شاعىنىڭ باستاۋى بولاتىنىنا سەنەمىن.
بۇدان كەيىن قازاقستاننىڭ حالىق ارتىستەرى الماحان كەنجەبەكوۆا، بولات ءابدىلمانوۆ، اتالمىش تەاتردىڭ ديرەكتورى ەرلىك جۋاسبەك ارىپتەستەرىنە قۇتتىقتاۋ تىلەكتەرىن ءبىلدىردى.
قازاقستاننىڭ حالىق ءارتىسى الماحان كەنجەبەكوۆا:
- وسى تەاتردىڭ شىمىلدىعىن تۇڭعىش اشقان اكتريسانىڭ ءبىرىمىن. العاش «قوزى كورپەش-بايان سۇلۋ» سپەكتاكلىندە قوزىنىڭ شەشەسى ماقپالدىڭ ءرولىن وينادىم. سودان بەرى ەلۋ جىلدىڭ قالاي ءوتىپ كەتكەنىن بىلمەي دە قالدىق. ارينە، اتاق ءۇشىن ەڭبەك ەتكەن جوقپىز، ءبىراق ءتوزىمنىڭ، شالقار شابىتتىڭ، تاباندى ەڭبەكتىڭ ارقاسىندا وسىنداي دارەجەگە ابىرويمەن جەتىپ وتىرمىز. سوڭعى جىلداردىڭ بەدەرىندە وسى تەاتردا قىرىق-ەلۋ جىل ەڭبەك ەتكەن ازاماتتارىمىز اتاق الىپ، ەڭبەگىنىڭ جەمىسىن كورىپ جاتىر. بۇل تەاتردىڭ كوگەرىپ-كوكتەۋىنە ۇلەس قوسقان سول ازاماتتاردىڭ قاي-قايسىنىڭ دا جولى - ادال ەڭبەكتىڭ، ونەرگە قىزمەت ەتۋدىڭ قانداي بولاتىنىن كورسەتەتىن ونەگەلى جول. تەاتردىڭ مارتەبەسى ءوسىپ، ونەرىمىز جاساي بەرسىن.
قازاقستاننىڭ حالىق ءارتىسى بولات ءابدىلمانوۆ:
- «اركىمگە ءوز تۋعان جەرى - باعدات ءشارى» دەيدى. سوندىقتان تۋعان جەردىڭ قاشاندا ءجونى بولەك. تالدىقورعان تەاترىنىڭ ونەرىنە وسىنداي ۇلكەن باعا بەرىلىپ، ابىرويعا بولەنىپ جاتقاندا قالاي قۋانبايمىز، جاقسىلىقتى بولىسۋگە ارنايى كەلدىم. جەتىسۋعا ءار كەلگەن سايىن تالدىقورعاننىڭ كوركەيىپ، ءوسىپ كەلە جاتقانىن، شارۋا ادامدارىنىڭ قىزۋ ەڭبەگىن كورىپ، ءوز باسىم قۋانىپ قايتامىن، ءوڭىردىڭ رۋحانياتى ءۇشىن دە ريزامىز. تەاتر - شىن مانىندەگى بەكزات ونەر. قوعامدى مەيىرىمگە، قۇرمەت پەن سىيلاستىققا تاربەلەۋدە ساحنانىڭ ءرولى زور. تەاتردىڭ «اكادەميالىق» دەگەن اتتى ارداقتاي بىلەتىن ۇجىمىنىڭ الار اسۋى ءالى دە الدا دەپ بىلەمىن.
مەرەكەلىك شارانىڭ سوڭىنان تەاتر ونەرپازدارى عابيت مۇسىرەپوۆتىڭ «قوزى كورپەش – بايان سۇلۋ» پەساسىن كورەرمەن نازارىنا ۇسىندى.
اتاپ وتسەك، تالدىقورعان تەاترى 1975 جىلى قۇرىلىپ، بيىل 50 جىلدىعى اتالىپ ءوتىلدى. وسى ەلۋ جىلدا ونەر ورداسىنىڭ رەپەرتۋارى 200-دەن استام قويىلىممەن تولىعىپ، قازاق جانە شەتەل كلاسسيكتەرىنىڭ تۋىندىلارى كورەرمەندەردەن لايىقتى باعاسىن العان.
ەسكە سالساق، بيىلعى مادەنيەت سالاسى قىزمەتكەرلەرىنىڭ كاسىبي مەرەكەسىنە ارنالعان سالتاناتتى جيىندا مەملەكەت باسشىسى بيكەن ريموۆا اتىنداعى دراما تەاترىنا اكادەميالىق مارتەبە بەرۋ تۋرالى باستاما كوتەرىپ، سونىڭ نەگىزىندە وسى جىلدىڭ 2 جەلتوقسانىندا ۇكىمەتتىڭ قاۋلىسى شىققان بولاتىن.