ەلدىڭ تاريحىندا كەيبىر جاندار بولادى، سولاردىڭ ەسىمى ءارقاشان ۇرپاق جۇرەگىندە ساقتالادى. سولاردىڭ ءبىرى – قازاقتىڭ داڭقتى قىزى، كەڭەس وداعىنىڭ باتىرى ءاليا مولداعۇلوۆا. بيىل ونىڭ 100 جىلدىق مەرەيتويى اتالىپ ءوتتى. الماتى قالاسىندا ۇيىمداستىرىلعان «ءاليا. ماڭگىلىك ەرلىك» اتتى كونسەرت-سپەكتاكل – تەك ونەر كەشى عانا ەمەس، جۇرەكتەرگە ەرلىك پەن باتىرلىق ۇيالاتاتىن رۋحاني ساباق بولدى.
ءاليا جاسىنا قاراماستان، ەلى ءۇشىن جانىن قيعان، قيىن ساتتە باتىلدىعىمەن حالىقتى تاڭعالدىرعان. ونىڭ ەرلىگى – تەك سول ءداۋىردىڭ عانا ەمەس، بۇگىنگى ۇرپاق ءۇشىن دە ۇلگى. بىزگە كەرەك نارسە – ۇرپاقتى وتانسۇيگىشتىككە، نامىسقا تاربيەلەۋ، رۋحىن بيىك ۇستاۋ. سول سەبەپتى بۇل شارا ماڭىزى جاعىنان ۇمىتىلماس وقيعا بولدى.
كەش بارىسىندا قازاقستاننىڭ حالىق ءارتىسى ليديا كادەن انا بەينەسىندەگى مونولوگىمەن شىنايى ونەر كورسەتتى، ءار ءسوزدىڭ استارىندا تەرەڭ وي جاتىر. حالىقارالىق جانە رەسپۋبليكالىق بايقاۋلاردىڭ لاۋرەاتى الماگۇل باتتالييەۆا باتىر رۋحىنا ارنالعان «ءاليا» انىمەن جۇرەكتەردى دىرىلدەتتى. جاس ارتىستەردىڭ تەاترلاندىرىلعان كورىنىستەرى ەرلىكتىڭ ءمانىن كوركەم تىلمەن جەتكىزدى.
قازاق ەستراداسىنىڭ جۇلدىزى رۋستەم نۇرجىگىتتىڭ «كەستەلى ورامال» ءانى، پەتروپاۆل قالاسىنىڭ «Sensitive» بي تەاترىنىڭ ونەرى كەشتىڭ كوركىن اشتى. سوڭىندا «الاش ۇلى» توبى «اتامەكەن» انىمەن حالىققا سۇيىسپەنشىلىكتى، ەلگە ادالدىقتى ەسكە سالدى.
ونەر مەن ويدىڭ قوسىندىسى ارقىلى، بۇل شارا بىزگە ءبىر نارسەنى تاعى ەسكە سالدى: ەرلىك – ماڭگىلىك، باتىرلىق – ۇرپاقتىڭ جۇرەگىندە ساقتالاتىن قازىنا. ءاليانىڭ ءومىرى – ەل سۇيگەن، نامىسىمەن ەرەكشەلەنگەن ادامنىڭ ۇلگىسى. سول ۇلگى ءار جۇرەكتە وشپەس شام بولىپ جارقىراۋى كەرەك.
«الاتاۋ» ءداستۇرلى ونەر تەاترىنىڭ
ادەبيەت ءبولىم باسشىسى
اۋباكيروۆا ينارا