· جادىڭىزدا ءجۇرسىن!
ەل اراسىندا «بي قيمىلدارى ارقىلى كوڭىل كۇيدى دە، دەنساۋلىقتى دا جاقسارتۋعا بولادى» دەگەن تۇسىنىك بار. مامانداردىڭ پىكىرى دە وسىعان سايادى.
بيمەن اينالىسۋ ارقا، ءىش جانە اياق بۇلشىق ەتتەرىن نىعايتادى ءارى بۇكىل اعزاداعى جانە بۋىندار مەن ومىرتقاداعى قان اينالىمىن، سونداي-اق، زات الماسۋ پروسەسىن جاقسارتادى.
سونىمەن قاتار، قيمىل-قوزعالىستىڭ ۇيلەسىمدىلىگىن ارتتىرىپ، دەنە ءبىتىمىن جەتىلدىرۋگە، تىنىس الۋ جۇيەسىن جاتتىقتىرۋعا كومەكتەسەدى.
سوندىقتان دا بيمەن شۇعىلدانۋدى ارىقتاۋدىڭ جولى عانا ەمەس، ءتۇرلى جاراقاتتار (6 ايدان سوڭ) مەن سىنىقتاردان (10-12 ايدان سوڭ) كەيىن ورگانيزمدى قالپىنا كەلتىرۋ ماقساتىنداعى ەمدىك شارا رەتىندە قاراستىرۋعا بولادى.
بۇل ورايدا، بي قيمىلدارى جۇگىرۋ، جاياۋ ءجۇرۋ سياقتى باسقا دا جاتتىعۋ تۇرلەرى ءتارىزدى، جۇرەك-قان تامىرلارى جۇيەسىنە ارتىق سالماق سالماي-اق، بۋىندارداعى قوزعالىس كولەمىنىڭ ارتۋىنا ىقپال ەتەدى.
سونداي-اق، بيمەن شۇعىلدانۋ ادامنىڭ بويىن جەڭىلدەتىپ، جۇيكەسىن تىنىشتاندىرادى. سول سەبەپتى دە، ول گيپەرتونيالىق اۋرۋلاردىڭ باستاپقى ساتىسىندا جاقسى كومەكتەسەدى. ويتكەنى مامانداردىڭ بولجامىنشا، گيپەرتونيانىڭ پايدا بولۋىنا كۇيزەلىستى جاعدايلار سەبەپكەر بولادى.