بيدايدىڭ باعاسى ارزانداۋى مۇمكىن

شارۋالار وسىنداي بولجام جاسادى.

الايدا نارىقتاعى جاعداي «ازىق-تۇلىك كورپوراسياسىنىڭ» شەشىمىنە قاراي قۇبىلادى، دەپ حابارلايدى Almaty-akshamy.kz

كۇزگى ناۋقاندا بيداي باعاسى تونناسىنا 100 مىڭ تەڭگەگە دەيىن تومەندەۋى مۇمكىن.

بيىل ەلدە 13 ميلليون تونناداي ەگىن جينالۋى مۇمكىن. بۇل، بىلتىرعا قاراعاندا، ءبىرشاما كوپ. سايكەسىنشە، ەكسپورتتىق الەۋەت تە جوعارى. ءبىراق بۇل باعىتتاعى ءبىرقاتار قيىندىق بار.

شىعىستاعى شارۋا قوجالىقتارى بيدايدىڭ تونناسى 100 مىڭ تەڭگەدەن كەم بولماۋ كەرەك دەپ سانايدى. ولار مۇنى ءادىل باعا دەپ ەسەپتەيدى. الايدا نارىقتاعى جاعداي «ازىق-تۇلىك كورپوراسياسىنىڭ» شەشىمىنە قاراي قۇبىلادى. ولار ساتىپ الۋعا قانداي باعا جانە قانداي كولەمدى بەلگىلەيدى سوعان بايلانىستى. بۇل اقپارات 15 قىركۇيەكتە جاريالانادى.

«ءبىرىنشى ماسەلە - ول نارىق. ءبىز نارىققا قاراپ وتىرامىز. ءبىراق ەل ىشىندە مەملەكەتتىك پرودكورپوراسيا دەگەن ۇيىم بار، ازىق-تۇلىك كورپوراسياسى. سول بيىل قازاقستان وندىرۋشىلەرىنەن وتە كوپ بيدايدى ساتىپ الۋدى جوسپارلاپ وتىر. ولار ارزان باعامەن ديىرمەندەرگە بيداي اۋدارعاننان كەيىن بيدايدىڭ قۇنى تۇسەدى. ۇن ارزاندايدى»، - دەپ ءتۇسىندىردى Kazgrain ۇلتتىق ەكسپورتتاۋشىلار قاۋىمداستىعى ءتوراعاسىنىڭ ورىنباسارى الىبەك اتاي.