«بەسىك جىرى» قىسقامەتراجدى انيماسيالىق ءفيلمى ءۇندىستاندا وتكەن Roshani International film festival 2023 فەستيۆالىندە «ۇزدىك انيماسيالىق فيلم» اتاعىن جەڭىپ الدى.
كينوتۋىندى مادەنيەت جانە سپورت مينيسترلىگىنىڭ قولداۋىمەن جارىققا شىققان، دەپ حابارلايدى Almaty-akshamy.kz قازاقپاراتقا سىلتەمە جاساپ.
اۋرانگاباد قالاسىندا ءتورتىنشى مارتە وتكەن حالىقارالىق فەستيۆال الەمنىڭ تۇكپىر-تۇكپىرىنەن تالانتتى كينەماتوگرافيستەردى جينادى. بيىل بايقاۋعا 1300-گە جۋىق جۇمىس ۇسىنىلدى. ونىڭ ىشىندە 132ء-ى انيماسيالىق فيلمدەر. Dala animation شىعارماشىلىق ۇجىمى دايىنداعان «بەسىك جىرى» ءمۋلتفيلمى قازىلاردىڭ ەڭ جوعارى باعاسىن الىپ، كورەرمەننىڭ كوڭىلىنەن شىقتى.
تۋىندى 2021 جىلى مادەنيەت جانە سپورت مينيسترلىگىنە قاراستى ۇلتتىق كينونى قولداۋ مەملەكەتتىك ورتالىعىنىڭ قولداۋىمەن جاسالدى.
«ايتا كەتۋ كەرەك، بۇل «بەسىك جىرى» انيماسيالىق ءفيلمىنىڭ العاشقى جۇلدەسى ەمەس. قازاقستاندىق مۋلتفيلم مامىر ايىندا يسپانيا استاناسى مادريدتە وتكەن بەدەلدى كينوفەستيۆالدە «ەڭ ۇزدىك قىسقامەتراجدى انيماسيالىق فيلم» جۇلدەسىن جەڭىپ العان ەدى. ول بايقاۋعا 1500 انيماسيالىق جۇمىس ۇمىتكەر رەتىندە ۇسىنىلعانىن ايتا كەتكەن ءجون»،- دەدى ق ر مسم مادەنيەت كوميتەتىنىڭ ءتوراعاسى ارمان جۇدەبايەۆ.
ەسكە سالايىق، «بەسىك جىرى» قىسقامەتراجدى انيماسيالىق ءفيلمى بۇعان دەيىن مادريدتە جۇلدە العان بولاتىن.