5،5 مىڭعا جۋىق ءوتىنىم قابىلداندى.
«ۇزدىك پەداگوگ-2022» بايقاۋىنا قاتىسۋعا ەلىمىزدىڭ ءار وڭىرىنەن 5 مىڭنان استام ءمۇعالىم مەن تاربيەشى ءوتىنىم جولدادى. بۇگىنگى تاڭدا ەڭ بەلسەندى قاتىسۋشىلار الماتى مەن اقمولا وبلىسىنان، دەپ حابارلايدى Almaty-akshamy.kz.
بيىل وتىنىشتەردى قابىلداۋ ءتارتىبى اۆتوماتتاندىرىلىپ، اشىق ءوتىپ جاتقانىن ايتا كەتەيىك. بارلىق كەزەڭدى سيفرلاندىرۋدىڭ ارقاسىندا بايقاۋعا دەگەن سەنىم ارتىپ، وتىنىمدەر سانى رەكوردتىق كورسەتكىشكە جەتتى.
كونكۋرسقا بالاباقشا، مەكتەپ پەن كوللەدجدىڭ شتاتىندا جۇمىس ىستەيتىن پەداگوگتەر قاتىسىپ جاتىر. جەڭىمپازدار 3 ملن تەڭگە كولەمىندە سىياقى الادى. بىلتىر ەلىمىزدىڭ ءار وڭىرىنەن 64 ءمۇعالىمنىڭ ءارقايسىسى 3 ملن تەڭگەدەن يەلەنگەن بولاتىن.
«بۇگىنگى تاڭدا https://teachercontest.iac.kz/ ۆەب-پورتالىندا بايقاۋدىڭ ءبىرىنشى جانە ەكىنشى كەزەڭىنە قاتىسۋ ءۇشىن 5،5 مىڭعا جۋىق ءمۇعالىم تىركەلدى. ەكىنشى، ياعني وبلىستىق كەزەڭگە قۇجات قابىلداۋ جالعاسىپ جاتىر. ول 30 قىركۇيەكتە اياقتالادى. بيىل بايقاۋعا قاتىساتىن ءار ءمۇعالىم ساۋالنامانى تولتىرعاننان كەيىن بايقاۋدىڭ ودان ارعى ديناميكاسىن باقىلاي الادى، ياعني قاتىسۋشىلاردىڭ قاي كەزەڭدە ەكەنىن، ساراپشىلار قانداي ۇپاي بەرگەنىن باقىلاي الادى. بۇل ءتاسىل بارلىق كەزەڭدە بايقاۋدىڭ اشىقتىعىن قامتاماسىز ەتەدى»، - دەيدى ق ر وقۋ-اعارتۋ مينيسترلىگى ورتا ءبىلىم كوميتەتىنىڭ ءتوراعاسى گۇلميرا كارىموۆا.
«ۇزدىك پەداگوگ» بايقاۋىنىڭ جەڭىمپازدارى 3 ملن تەڭگە كولەمىندەگى اقشالاي سىيلىقپەن قاتار توسبەلگىلەرگە دە يە بولادى.
https://teachercontest.iac.kz/ ۆەب-پورتالى ارقىلى ءوتىنىم بەرۋدەن باستاپ كونكۋرس قۇجاتتارىن جۇكتەۋگە جانە بارلىق كەزەڭدەگى ۇپايلاردى باقىلاۋعا بولادى.
بايقاۋ ەرەجەلەرى تۋرالى قوسىمشا اقپارات وقۋ-اعارتۋ مينيسترلىگىنىڭ سايتىندا بار.