الماتى قالاسىنىڭ باسشىلىعى المالى اۋدانىنىڭ جول-كولىك ينفراقۇرىلىمىن ودان ءارى دامىتۋ ماسەلەسىنە ەرەكشە كوڭىل ءبولىپ كەلەدى. بۇل تۋرالى بۇگىن ە.دوسايەۆتىڭ اۋدان تۇرعىندارىمەن كەزدەسۋىندە بەلگىلى بولدى، دەپ حابارلايدى Almaty-akshamy.kz.
- وسى جىلدىڭ ماۋسىم ايىنىڭ باسىنان باستاپ اۋداندىق ماڭىزى بار 11 كوشەگە جانە جالپى ۇزىندىعى 25 شاقىرىم بولاتىن 5 ماگيسترالدى كوشەگە ورتاشا جوندەۋ جۇمىستارىن باستايمىز. بۇل ماقساتتارعا جەرگىلىكتى بيۋدجەتتەن 4،3 ملرد. تەڭگە ءبولىندى. دەسەنتراليزاسيا اياسىندا بيىل اۋدان اكىمدىكتەرى جولدارعا اعىمداعى جوندەۋ جۇمىستارىن جۇرگىزە باستايدى. بۇل ءۇشىن المالى اۋدانىنا 500 ملن تەڭگە ءبولىندى، شارا 46 مىڭ م2 جول توسەمىن جوندەۋگە مۇمكىندىك بەرەدى، - دەدى الماتى قالاسىنىڭ اكىمى ە.دوسايەۆ
وسى جىلدىڭ ماۋسىم ايىندا اكىمدىك بايتۇرسىنوۆ پەن دوسمۇحامەدوۆ كوشەلەرىنىڭ اراسىنداعى ايتەكە بي كوشەسىنىڭ بويىنا تروتۋار ورناتا وتىرىپ، جولدى ۇزارتۋدى باستاۋدى جوسپارلاپ وتىر.