ق ر توتەنشە جاعدايلار ءمينيسترى يۋريي يلين شاحتينسك قالاسىنداعى لەنين اتىنداعى شاحتادا بەس كەنشىنىڭ ءومىرىن قيعان اپاتتىڭ سەبەبىن ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«3 قاراشادا لەنين اتىنداعى شاحتادا بولعان اپات بۇرىن بۇرعىلانعان درەناجدىق ۇڭعىمالاردان گاز بەن كومىر شاڭىنىڭ كوپ مولشەرىنىڭ شىعۋىنا بايلانىستى كەنەتتەن گازديناميكالىق قۇبىلىس ناتيجەسىندە پايدا بولدى. نەگىزگى سەبەپ – مەتاننىڭ شاڭمەن شىعارىلۋىنىڭ كوپ مولشەرى جانە №79 پيكەت ايماعىنداعى بۇرعىلاۋ ستانوگىنداعى بۇرعىلاۋ شتانگاسىنىڭ مەتالل بەكىتكىشتەردىڭ ەلەمەنتتەرىنە ۇيكەلۋى سالدارىنان ۇشقىن پايدا بولىپ، جارىلىس ورىن العان»، - دەدى مينيستر.
سونداي-اق، يۋريي يلين ءبىرقاتار بۇزۋشىلىقتار انىقتالعانىن، ونىڭ ىشىندە ينجەنەرلىك-تەحنيكالىق پەرسونال تاراپىنان ءتيىستى باقىلاۋدىڭ جوقتىعى سالدارىنان جۇمىس ءوندىرىسىنىڭ قاناعاتتانارلىقسىز ۇيىمداستىرىلعانىن اتاپ ءوتتى.
قازىرگى ۋاقىتتا لەنين شاحتاسىنىڭ 26 قىزمەتكەرى، ونىڭ ىشىندە باسشىلىق لاۋازىمداردى اتقاراتىن ەكى شەتەلدىك ازامات شاحتاداعى اپاتقا جاۋاپتى بولىپ انىقتالدى.
ەستەرىڭىزگە سالا كەتەيىك، 3 قاراشادا تۇنگى ساعات 3.03-تە «ارسەلورميتتال تەمىرتاۋ» اق كومىر دەپارتامەنتىنىڭ لەنين اتىنداعى شاحتاسىندا مەتان گازى جارىلعان. اپات كەزىندە شاحتادا، جەر استىندا 106 ادام بولعان. 101 ادام ەۆاكۋاسيالاندى، بەس ادام قايتىس بولدى، ءتورت ادام اۋرۋحاناعا جاتقىزىلدى.