الماتى اكىمدىگىنە قالا ماڭىنداعى ەلدى مەكەندەردىڭ ماسەلەسىن شەشۋگە سىرتتان قارىز الۋعا رۇقسات بەرىلەدى، دەپ حابارلايدى اlmaty-akshamy.kz
بۇل تۋرالى ۇلتتىق ەكونوميكا ءمينيسترى الىبەك قۋانتىروۆ ءماجىلىس كۋلۋارىندا ايتتى. ونىڭ سوزىنشە، بۇگىن ءماجىلىس ءبىرىنشى وقىلىمدا قابىلداعان "اگلومەراسيالاردى دامىتۋ تۋرالى" زاڭ جوباسى الماتى قالاسى اكىمدىگىنە سىرتتان قارىز الۋدىڭ تاعى ءبىر تەتىگىن بەرەدى.
«مۇنداي مۇمكىندىك تەك الماتى قالاسىنا عانا بەرىلەتىنىن ايتا كەتۋ كەرەك. بۇل قاراجات الماتى ماڭىنداعى اگلومەراسيانىڭ اۋماعىندا ينفراقۇرىلىمدى دامىتۋ جوبالارىنا جۇمسالۋى كەرەك. ال ونىڭ ءليميتى بيۋدجەتتى رەتتەيتىن نورمالارعا ساي بەلگىلەنەدى. الماتى قالاسىنىڭ بيۋدجەتتىك مۇمكىندىكتەرى بەلگىلەنگەن. دەمەك، اتالعان ماقساتقا الىناتىن سىرتقى قارىزدىڭ ءليميتى سول بەلگىلەنگەن بيۋدجەت مۇمكىندىكتەرىنەن اسپاۋى كەرەك. ليميت وسى نەگىزدە رەتتەلەدى»، - دەدى مينيستر.
سونداي-اق ول اتالعان ماقساتتاعى قارىزدى الماتى اكىمدىگى تەك تەڭگەمەن عانا الا الاتىنىن اتاپ ءوتتى. ايتۋىنشا، اكىمدىككە تەڭگەمەن قارىز بەرۋگە نيەتتى حالىقارالىق ۇيىمدار بار.
«دۇنيەجۇزىلىك بانك توبى بار عوي. ونىڭ IFC (International Finance Corporation) دەيتىن قۇرىلىمى بار. وسى IFC ۇجىمى الماتى قالاسىنىڭ اكىمدىگىنە ءتيىستى قاراجات بەرۋگە دايىن. ءبىراق ول ۇلتتىق ۆاليۋتامەن بەرىلەدى»، - دەدى ۇلتتىق ەكونوميكا ءمينيسترى.