پارلامەنت پالاتالارىنىڭ بىرلەسكەن وتىرىسىندا پرەزيدەنت قاسىم-جومارت توقايەۆ وسىنداي پىكىر ايتتى.
«قازاقستاندا كەن ءوندىرۋ ونەركاسىبى جاقسى دامىعانى بارشاعا بەلگىلى. وسى سالا ۇلتتىق ەكونوميكانىڭ ءوسىمىن قامتاماسىز ەتەتىن سەنىمدى تابىس كوزى بولىپ كەلەدى. بولاشاقتا دا سولاي بولۋعا ءتيىس. كوپتەگەن مەتالدىڭ الەمدىك نارىقتاعى باعاسى بۇرىن-سوڭدى بولماعان دەڭگەيگە جەتتى. سوعان قاراماستان ءىرى ءوندىرىس ورىندارىنا جاقىن تۇراتىن جۇرتتىڭ نارازىلىعى كۇشەيىپ بارادى. ولار ەكولوگيا ناشارلاپ، دەنساۋلىققا زيان كەلتىرىپ جاتقانىن ايتىپ، شاعىمدانۋدا»، - دەدى مەملەكەت باسشىسى.
سونداي-اق، پرەزيدەنت جۇمىسشىلاردىڭ وندىرىستە مەرتىگۋى جانە قازاعا ۇشىراۋى جيىلەپ كەتكەنىنە توقتالدى.
«ۇكىمەت كاسىپورىنداردىڭ تەحنولوگيالىق جانە ەكولوگيالىق احۋالىن، دەنساۋلىق ساقتاۋ جۇيەسىن جاقسارتۋ ءۇشىن باتىل شارالار قابىلداۋى قاجەت. سوندىقتان ءىرى ءوندىرىس كاسىپورىندارى 5 جىل سايىن تەحنولوگيالىق جانە ەكولوگيالىق اۋديت جاساۋى كەرەك. بۇل تالاپ ينفراقۇرىلىم سالاسىنداعى كاسىپورىندارعا دا قويىلۋعا ءتيىس»، - دەدى قاسىم-جومارت توقايەۆ.