جاقسى ادامدار ومىردە كوپ. ءبىراق ءبىز كوبىمىز ولاردى بايقاماي جاتامىز. ماسەلەن، قازاقستان رەسپۋبليكاسى ۇلتتىق ۇلانىنىڭ 3660 اسكەري ءبولىمىنىڭ قىزمەتشىسى ەفرەيتور تۇرسىنباي تۇردىبەكوۆتىڭ جاساعان ەرلىگىن ەشكىم بىلمەگەن جانە ول بۇل تۋرالى ەشكىمگە ايتپاعان. سەبەبى، ول ءوزىنىڭ ادامگەرشىلىك ارەكەتىن ەرلىك دەپ سانامايدى.
تۇرسىنباي تۇردىبەكوۆتىڭ ورتكە ورانعان ۇيدەن بەس ادامدى امان الىپ شىققانىن ارىپتەستەرى ۇلتتىق ۇلاننىڭ 3660 اسكەري ءبولىمىنىڭ قولباسشىلىعىنا الماتى وبلىسى ىلە اۋدانى بورالداي كەنتىنىڭ اكىمى د. قوڭىربايەۆتىڭ اتىنان كەلىپ تۇسكەن حاتتان كەيىن بىلگەن.
وقيعا بيىل جازدا بولعان. ساعات تۇنگى 22:00 شاماسىندا بورالداي كەنتىندەگى تىنىشباي كوشەسىندەگى ۇيدەن ءورت شىققان. كورشىسىنىڭ ءۇيىنىڭ وتقا ورانىپ جاتقانىن كورگەن تۇرسىنباي تۇردىبەكوۆ ءوز ومىرىنە تونگەن قاۋىپكە قاراماستان، ۇيدە ادامدار بار ەكەنىن ءبىلىپ، بيىك قورشاۋدىڭ قاقپاسىنان ىشكە سەكىرىپ تۇسەدى. ول تەمىر قاقپانى بار كۇشىمەن اشىپ، ءۇش بالانى، انالارىن جانە قارت اجەنى سىرتقا الىپ شىققان.
– سول كۇنى مەن تاۋلىكتىك كەزەكشىلىكتەن شىعىپ، ۇيدە ەدىم. دەمالىسىمدى پايدالانىپ، اكەمنىڭ كولىگىن قاراپ، اقاۋلى جەرلەرىن جوندەپ جاتقان بولاتىنمىن. كەنەتتەن كورشىنىڭ ءۇيىنىڭ شاتىرى وتقا ورانىپ جاتقانىن كوردىم دە، بىردەن سولاي قاراي جۇگىردىم. سىرتقى قاقپا اشىلماي تۇردى. ويلانباي، قاقپاعا ورمەلەپ شىعىپ، اۋلاعا سەكىرىپ ءتۇستىم. ۇيدەن كورشىمنىڭ ايەلى جۇگىرىپ شىقتى. ول ۇيدە بالالار مەن قارت ەنەسىنىڭ بارىن ايتتى. مەن بىردەن ۇيگە كىرىپ، ولاردى شىعارا باستادىم. قاقپا جالىننىڭ ىستىعىنان قاتىپ قالىپتى، ءبىراق مەن بار كۇشىمدى سالىپ، ەسىكتى اشىپ، وتباسى مۇشەلەرىن سىرتقا الىپ شىقتىم. وسى ساتتە پاترۋلدە جۇرگەن پوليسيا قىزمەتكەرلەرى دە كەلىپ ۇلگەردى. بۇدان كەيىن ءورتتىڭ كورشى ۇيلەرگە تارالماۋى ءۇشىن پوليسيا قىزمەتكەرلەرىمەن جانە سول جەردە تۇرعان ادامدارمەن بىرىگىپ، ءقاۋىپتى زاتتار مەن كولىكتەردى شىعارا باستادىق. ءورت – ءتىلسىز جاۋ، جالىنىنا يە بەرمەيدى. ادامداردىڭ ءدىن امان بولعانىنا قۋاندىق، – دەيدى ۇلاندىق ەفرەيتور تۇرسىنباي تۇردىبەكوۆ.
اسكەري ءبولىمنىڭ قولباسشىلىعى ەفرەيتور تۇرسىنباي تۇردىبەكوۆتىڭ ەرلىگى مەن قيىن جاعدايداعى باتىل ارەكەتىن ەسكەرىپ، ونى جوعارى قولباسشىلىققا ماراپاتتاۋعا ۇسىنىس بەردى.