كورسەتىلىمگە بيلەتتەر بىرنەشە كۇن بۇرىن ساتىلىپ كەتكەن
حالىقارالىق بەرلين كينوفەستيۆالىنىڭ «فورۋم» باعدارلاماسى شەڭبەرىندە ق ر مادەنييەت جانە سپورت مينيسترلىگى تاپسىرىسى بويىنشا «ۇلتتىق كينونى قولداۋ مەملەكەتتىك ورتالىعى» قولداۋىمەن شاكەن ايمانوۆ اتىنداعى «قازاقفيلم» اق تۇسىرگەن «اقىن» ءفيلمىنىڭ ەۋروپالىق تۇساۋكەسەرى ءوتتى، دەپ حابارلايدى Almaty-akshamy.kz Egemen.kz-كە سىلتەمە جاساپ.
ايتا كەتسەك، ءفيلمنىڭ رەجيسسەرى اتالعان كورسەتىلىمگە قاتىسا المادى، الايدا شەتەلدىك كورەرمەندەرگە وتاندىق تۋىندىنى پروديۋسەر يۋليا كيم جانە اكتريسا گۇلجان تۇزەلبايەۆا تانىستىردى.
«ءفيلمنىڭ تۇساۋكەسەرىنە قاتىسىپ وتىرعانىمىزعا وتە قۋانىشتىمىز. ۇيىمداستىرۋشىلارعا العىسىمىز شەكسىز. رەجيسسەر دارەجان ومىربايەۆ بۇگىنگى بەلگىلى سەبەپتەرگە بايلانىستى كورسەتىلىمگە قاتىسا المادى. مەنىڭ ويىمشا شىنايى ونەرگە بەرىلگەن جاندار بۇل فيلمنەن وزدەرىن كورە الادى. مەن فيلمدەگى باستى كەيىپكەر وبرازىنان رەجيسسەردىڭ ءوزىن كورىپ تۇرعانداي بولامىن. وسى كينوتۋىندىنىڭ جارىق كورۋىنە اتسالىسۋعا مۇمكىندىك بەرگەن دارەجان ومىربايەۆقا العىسىمدى بىلدىرەمىن»، - دەدى كورسەتىلىم الدىندا يۋليا كيم.
قازاقستاندىق كينوتۋىندى بەرلين كينوفەستيۆالى كورەرمەندەرىنىڭ قىزىعۋشىلىعىن تۋدىرعانىن ايتا كەتۋ كەرەك. بۇل كورسەتىلىمگە بيلەتتەر بىرنەشە كۇن بۇرىن ساتىلىپ كەتكەن ەكەن. تۇساۋكەسەرگە كەلگەن قوناقتاردىڭ اراسىندا دارەجان ومىربايەۆتىڭ شىعارماشىلىعىمەن بۇرىننان تانىس كورەرمەندەر دە بولدى.
«اقىن» ءفيلمى تەحنولوگيالار دامىعان قازىرگى زاماندا ونەردىڭ قوعامدا الاتىن ورنى تۋرالى وي قوزعاپ، پوەزياعا سۇرانىس ازايعان داۋىردە اقىننىڭ كۇيىنىشى تۋرالى سىر شەرتەدى. قازاق حالقىنىڭ XIX عاسىرداعى ەڭ كورنەكتى اقىندارىنىڭ ءبىرى ماحامبەت وتەمىس ۇلىنىڭ قيلى تاعدىرى جايىندا ويعا باتقان باستى كەيىپكەر نازىك جۇرەكتى اقىنداردىڭ ءومىرى قاشان دا قيىن بولعانىن تۇسىنەدى. ءفيلمنىڭ سەنارييى نەمىس جازۋشىسى گەرمان گەسسەنىڭ «اۆتورلىق كەش» اتتى اۆتوبيوگرافيالىق اڭگىمەسى جەلىسىمەن جازىلعان. فيلمدەگى باستى ءرولدى «جىگىتتەر» توبىنىڭ ءانشىسى ەردوس قانايەۆ سومدايدى.
ەسكە سالا كەتسەك، اتالعان فيلم توكيودا وتكەن حالىقارالىق كينوفەستيۆال شەڭبەرىندە العاش كورسەتىلىپ، دارەجان ومىربايەۆ «ۇزدىك رەجيسسەر» جۇلدەسىمەن ماراپاتتالعان بولاتىن.